အိန္ဒိယနိုင်ငံ ဗုဒ္ဓ၀ါဒ ကွယ်ပျောက်ခြင်း ...

ဗုဒ္ဓ၀ါဒဟာ အိန္ဒိယနိုင်ငံမှာ အေဒီ (၇) ရာစုက စတင်ပြီး အရှိန်အ၀ါ ကျဆင်းလာခဲ့ကြောင်း စာပေမှတ်တမ်း အချို့အရ သိရှိကြရတယ်။ ဒီအချက် ကို တရုတ် ခရီးသည် ရဟန်းတော်တွေရဲ့ မှတ်တမ်းတွေကို ကိုးကားပြီး ခန့်မှန်းကြတာဖြစ်တယ်။ အဲဒီ တရုတ် ရဟန်းတော် တွေကတော့ ရဟန်းတော် ဖဟီယန် (အေဒီ ၃၉၉-၄၁၄)၊ ရဟန်းတော် ဆောင်ယွန် (အေဒီ ၅၁ဂ)၊ ရဟန်းတော် ရွှင်ကျန် (အေ ဒီ ၆၂၉ - ၄၅)၊ နဲ့ ရဟန်းတော် အိချင်း (အေဒီ ၆၇၁-၉၅) တို့ဖြစ်ပါတယ်။
အေဒီ (၅) ရာစု အတွင်း အိန္ဒိယနိုင်ငံ ကို ဘုရားဖူးရောက်ရှိခဲ့တဲ့ တရုတ် ရဟန်းတော် ဖဟီယန် ဟာ အိန္ဒိယနိုင်ငံရဲ့ ဒေသများ စွာမှာ ဗုဒ္ဓ၀ါဒ ထွန်းကားဆဲဖြစ်ကြောင်း တွေ့မြင်ခဲ့တယ်။ သို့သော်လည်း ကာညကုခ်ျ၊ ကပိလ၀တ်၊ ရာမဂါမ၊ ဝေသာလီနဲ့ ဂါယာ မှာ တွေ့မြင်ခဲ့ရတဲ့ ဗုဒ္ဓသာသနာ အခြေနေနဲ့ ပတ်သက်ပြီး ဖဟီယန်ဟာ ၀မ်းနည်းပက်လက် ဖြစ်ခဲ့ရပါတယ်။ ကာညကုခ်ျမှာ ထေရ၀ါဒ ဘုန်းကြီးကျောင်း နှစ်ကျောင်းမျှသာ တွေ့ခဲ့ရတယ်။ ကပိလ၀တ်မြို့တော်ကြီးကတော့ အုပ်ချုပ်သူဘုရင်မရှိ၊ ပြည်သူ ပြည်သားတွေ ဆိတ်သုဉ်းလုနီးပါးဖြစ်နေပြီး သံဃာအနည်းငယ်၊ အိမ်လေးငါးဆယ် လုံးနဲ့ တောရိုင်းကြီး ပမာ ဖြစ်နေတာကို သူတွေ့မြင်ခဲ့ရကြောင်း မှတ်တမ်းတင်ထားတယ်။ ရာမဂါမ မှာ ဘုန်းကြီးကျောင်း တစ်ကျောင်း၊ ဝေသာလီမှာ လည်း ဘုန်းကြီး ကျောင်း တစ်ကျောင်းမျှသာ ကျန်တော့ပြီး သာဝတ္ထိမြို့ကြီးကတော့ ပျက်စီးတိမ်ကော နေခဲ့ပြီ လို့ ဆိုထားတယ်။
အေဒီ (၆) ရာစု အစောပိုင်းမှာ အိန္ဒိယနိုင်ငံကို ရောက်ရှိခဲ့တဲ့ တရုတ်ရဟန်းတော် ဆောင်ယွန်နဲ့ တောက်ရှန် တို့ဟာ ကာညကု ခ်ျမှာ ဗုဒ္ဓ၀ါဒ ဘုရားကျောင်းများစွာတွေ့ခဲ့ရတယ်။ သို့ပေမဲ့ အဲဒီ ဘုရားကျောင်းတွေမှာ ရဟန်းတော်၊ ရဟန်းမ တစ်ပါးတစ်လေ မှ မတွေ့ရဘူးလို့ မှတ်တမ်း တင်ထားပါတယ်။ ကာညကုခ်ျ ဟာ ဟရ်ရှ မင်းဆက်များ လက်ထက်မှာ အကြီးအကျယ် ဖွံ့ဖြိုးထွန်း ကားခဲ့တဲ့ ဗုဒ္ဓ၀ါဒ ဗဟိုဌာနဖြစ်ခဲ့ပေမဲ့ အဲဒီ ခေတ်ကာလ ကတည်းက ဗြာဟ္မဏ၀ါဒီများစွာနဲ့ နတ်ကိုးကွယ်သူများ စွာလည်း အတူယှဉ်တွဲ နေထိုင်ခဲ့ကြတာဖြစ်တယ်။ အဲဒီ မှာ ဘုန်တော်ကြီးကျောင်းတွေရှိနေပေမဲ့ ဘုရားကျောင်း၊ စေတီအရေအတွက် ဟာ ဘုန်းကြီးကျောင်းအရေအတွက်ထက် သာလွန်များပြားနေတယ်လို့ ဆိုပါတယ်။
ရဟန်းတော် ရွှင်ကျန်ရောက်ရှိခဲ့ချိန် ဝေသာလီမှာ ဗုဒ္ဓသာသနာ တိမ်ကောပျောက်ကွယ် သွားပြီလို့မဆိုနိုင်သေးဘူး။ အဲဒီမှာ ဗုဒ္ဓဘာသာ ဘုန်းကြီးကျောင်းအတော်များများကို တွေ့နေရဆဲဖြစ်တယ် လို့ဆိုပါတယ်။ သို့ပေမဲ့လို့ အဲဒီ ဘုန်းတော်ကြီးကျောင်း တွေမှာ သုံးလေးကျောင်းက လွဲလို့ အခြားကျောင်းတိုက်တွေဟာ သံဃာများစွာ မတွေ့ရဘူးလို့ ဆိုပါ တယ်။ ပြီးတော့ဟိန္ဒူဘုရား ကျောင်း တွေနဲ့ ဟိန္ဒူ အယူဝါဒ ကိုးကွယ်မူ အမျိုးမျိုးဟာ ဝေသာလီမှာ အရှိန်အဟုန်နဲ့ ဖွံ့ဖြိုးနေတာ ကို သူတွေ့ခဲ့ရတယ်။ဒါ့အပြင် ဒီဂမ္ဘရ ဂျိန်းဝါဒ ကလည်း ဝေသာလီ မှာ ခိုင်ခိုင်မာမာ အမြစ်တွယ်နေပြီး ဖြစ်တယ် လို့ ဆိုတယ်။
အိန္ဒိယနိုင်ငံ အနောက်မြောက်ပိုင်း၊ ဆွတ် တောင်ကြားမှာတည်ရှိခဲ့တဲ့ ဥဒယာန (ဥဒ္ဒိယာန) ဟာ ဗုဒ္ဓသာသနာရဲ့ အရေးပါတဲ့ ဗဟိုနေရာ တစ်ခု ဖြစ်ခဲ့တယ်။ ဗုဒ္ဓဘာသာ ဘုန်းကြီးကျောင်းပေါင်း (၁၄၀၀၀) ရှိပြီး သံဃာတော်အပါး (၁၈၀၀၀) သီတင်းသုံး နေထိုင်ခဲ့တယ် လို့ ဆိုတယ်။ သို့ပေမဲ့ ရဟန်းတော် ရွှင်ကျန် ရောက်ရှိခဲ့တဲ့ အချိန်မှာ ဘုန်းကြီးကျောင်းတွေ အလွန်နည်းပါးနေပြီး ရဟန်းတော်တွေဟာလည်း ၀ိနည်းစည်းကမ်းနဲ့ အညီ မနေထိုင်ကြတော့ဘဲ ပဉ္စလက်အတတ်တွေ၊ ပျောက်စေ အတတ်တွေကိုသာ လိုက်စားနေကြတယ် လို့ ဆိုတယ်။ ဂန္ဓာရတိုင်းမှာတော့ ဘုန်းကြီးကျောင်း (၁၀၀၀) လောက်ဟာ ပျက်စီးတိမ်ကောနေပြီး သံဃာအနည်းငယ် မျှသာကျန်ရှိတော့ကြောင်း၊ အမြတ်တနိုး ကိုးကွယ်ပူဇော်ခဲ့ကြတဲ့ ဗုဒ္ဓမြတ်စွာရဲ့ သပိတ်တော်လည်း ပျောက်ဆုံးသွားခဲ့ကြောင်း မှတ်တမ်းမှာ ဖော်ပြထားတယ်။ ဘာသာခြား တိတ္ထိတွေကိုလည်း တွေ့ရပြီး ဗုဒ္ဓ၀ါဒ ဟာ ဂန္ဓာရတိုင်း ရဲ့ အရှေ့မြောက်ပိုင်းနဲ့ တောင်ပိုင်းမှာ ဆိတ်သုဉ်းလုနီးပါးဖြစ်နေပြီ လို့ သိရပါတယ်။
တက္ကသီလာ၊ သိင်္ဃပုရနဲ့ ဥရသ မြို့တွေဟာ တခေတ်တခါက ဗုဒ္ဓ၀ါဒ အကြီးအကျယ် ဖွံ့ဖြိုးထွန်းကားရာ မြို့တွေဖြစ်ခဲ့ပေ မဲ့ ၊ ရွှင်ကျန်ရောက်ရှိတဲ့ အချိန်မှာ မှေးမှိန် တိမ်ကောနေပြီ လို့ သိရပါတယ်။ ဘုန်းကြီးကျောင်းတွေများ စွာ ရှိပေမဲ့ သံဃာတွေ ကင်းမဲ့ ဆိတ်သုဉ်းနေပြီ လို့ ဆိုတယ်။ ကသ္မီရ တိုင်းရဲ့ ဒေသများစွာမှာလည်း ဗုဒ္ဓသာသနာဟာ နိမ့်ကျပျက်စီးနေခဲ့ပြီး ရာဇတရင်္ဂိနီ မှတ်တမ်းအရ ဆိုရင် အဲဒီ ဒေသက သံဃာတွေဟာ (၆) ရာစုလောက်က စပြီး အိမ်ထောင်သားမွေးလုပ်ကြတယ် လို့ သိရပါတယ်။
လာလိတ ဒိတျာ ဘုရင် (အေဒီ ၇၃၃-၆၉) ဟာ ဘုန်းကြီးကျောင်းတွေ ၊ စေတီတွေ လှူဒါန်းခဲ့တယ် လို့တွေ့ရပေမဲ့ သူ့နောက်ပိုင်း ဆက်ခံတဲ့ ဘုရင်တွေဟာ ရှီဝ နတ်ဘုရား ကိုးကွယ်တဲ့ ဘုရင်တွေဖြစ်တယ်။ ဆင်းဒ် ဒေသ မှာ ဗုဒ္ဓဘာသာ ၀င် (၁၀၀၀၀)ခန့် နဲ့ ဘုန်းကြီးကျောင်းပေါင်း (၁၀၀) လောက်ရှိတယ် လို့ တွေ့ရတယ်။ သို့ပေမဲ့ အဲဒီ ဗုဒ္ဓဘာသာဝင်တွေ ဟာ ဗုဒ္ဓတရားတော် အဆုံးအမ တွေကို တလေးတစား မလိုက်နာကြတော့ ဘူး လို့ ရွှင်ကျန်ရဲ့ မှတ်တမ်းမှာ ဖော်ပြထားတယ်။ အာရပ်တွေ ၀င်ရောက် သိမ်းပိုက်ခဲ့တဲ့ ခေတ်ကာလထိ အဲဒီ ဆင်းဒ် ဒေသမှာ ဗုဒ္ဓဘာသာဝင်တွေ ရှိနေဆဲ ဖြစ်တယ်လို့ဆိုပေမဲ့အကြွင်းအကျန်မျှသာ ဖြစ်ပြီးအား
မကောင်းတော့ကြောင်းတွေ့ရတယ်။
ထာနေရွှ ဒေသမှာ ဘုန်းကြီးကျောင်း (၃) ကျောင်းသာ တွေ့ရပြီး နတ်ဘုရားကျောင်းတွေ ရာပေါင်းများစွာရှိနေခဲ့တယ်။ မထုရာ မှာတော့ ဘုန်းကြီးကျောင်း (၂၀) နဲ့ သံဃာ (၃၀၀၀) လောက် သီတင်းသုံးနေ ထိုင်ခဲ့ကြကြောင်း ဖဟီယန်ရဲ့ မှတ်တမ်းမှာ ရေးသားခဲ့ပေမဲ့ ရွှင်ကျန်ခေတ်ကို ရောက်တဲ့ အခါ သံဃာ (၂၀၀၀) မျှသာ ရှိတော့ကြောင်း သိရတယ်။ သုဂန မှာ ဗုဒ္ဓဘာသာ ဘုန်းကြီးကျောင်း (၅) ကျောင်းမျှသာ ရှိခဲ့ပေမဲ့ နတ်ဘုရားကျောင်းကတော့ (၁၀၀) ကျော်လောက်ရှိနေပြီး ဖြစ်တယ်။ မဏိပူရ မှာ ဘုန်းကြီးကျောင်းက (၁၀) ကျောင်း၊ နတ်ဘုရားကျောင်းက (၅၀)နဲ့ ဗြာဟ္မပုတ္တမှာ ဘုန်းကြီးကျောင်း (၅) ကျောင်း၊ နတ် ဘုရားကျောင်း (၁၀) ကျောင်း စသည်ဖြင့် အဲဒီ ခေတ်က ထင်ရှားတဲ့ မြို့ရွာတိုင်းမှာ ဗုဒ္ဓဘာသာ ဘုန်းကြီးကျောင်းတွေ နည်းပါးနေပြီး ဟိန္ဒူဝါဒ အားကောင်းခိုင်မာနေကြောင်း တွေ့ရပါတယ်။
ဗုဒ္ဓ၀ါဒ ထွန်းလင်းခဲ့တဲ့ ကောသမ္ဗီမှာ ဘုန်းကြီးကျောင်း (၁၀) ကျောင်းရှိနေပေမဲ့ တိမ်ကောပျက်စီးနေကြပြီလို့ ဖော်ပြထားပြီး နတ်ဘုရားကျောင်းတွေကတော့ (၅၀) လောက်ရှိနေခဲ့ပါတယ်။ ၀ိသာခါမှာလည်း ဗုဒ္ဓဘာသာဝင်တွေနဲ့ ဘုန်းကြီးကျောင်းတွေ မရှိလောက်နည်းပါးနေပြီး သာဝတ္ထိမှာတော့ ဘုန်းကြီးကျောင်းတွေ အားလုံးနီးပါး ပျက်စီးတိမ်ကောနေပြီး နတ်ဘုရားကျောင်း တွေ ရာချီ ရှိနေကြောင်း ရေးသားထားတယ်။ ဗာရာဏသီမှာ ဘုန်းကြီးကျောင်း (၃၀) နဲ့ သံဃာတော်ပေါင်း (၃၀၀၀) ထောင် လောက် သီတင်းသုံးနေထိုင်ကြတယ် ဆိုပေမဲ့ နတ်ဘုရားကျောင်းပေါင်းဟာ (၁၀၀) လောက်ရှိနေပြီး ရှီဝ ၀ါဒီ တွေ (၁၀၀၀၀) လောက် ရှိနေကြောင်းသိရတယ်။
ခုဖော်ပြခဲ့တဲ့ မှတ်တမ်းအချက်လက်တွေဟာ အဲဒီ ခေတ်ကာလ အိန္ဒိယ နိုင်ငံအတွင်း ဒေသ အသီးသီးမှာ ဗုဒ္ဓ၀ါဒ မှေးမှိန် တိမ်ကောလာနေကြောင်းပြသနေပြီး တစ်ချိန်တည်းမှာဘဲ ဟိန္ဒူဝါဒ ဟာ အရှိန်အဟုန်နဲ့ အင်အားကောင်းစွာ ဖွံ့ဖြိုးလာနေ ကြောင်း ဖော်ပြနေပါတယ်။ ဖဟီယန်ရဲ့ မှတ်တမ်းအရ ဗုဒ္ဓ၀ါဒဟာ အိန္ဒိယနိုင်ငံမှာ ခပ်စောစော နှစ်ကာလက စတင်ပြီး အရှိန် အ၀ါ ကျဆင်းလာခဲ့ကြောင်း သိရပြီး ရွှင်ကျန်နဲ့ အိချင်းရဲ့ မှတ်တမ်းတွေကတော့ အေဒီ (၇) ရာစု အိန္ဒိယနိုင်ငံမှာဗုဒ္ဓ၀ါဒအားနည်းယုတ်လျော့နေပြီ ဖြစ်ကြောင်း ပြသနေပါတယ်။ အဲဒီ ခေတ် အိန္ဒိယနိုင်ငံက ဒေသ အတော်တော်များများမှာ ဗုဒ္ဓ၀ါဒဟာ အဓိက ကိုးကွယ်ရာ ဘာသာတရား တစ်ခု မဟုတ်တော့ဘူး လို့ ဆိုရမှာဖြစ်တယ်။
-ဆက်ရန်-
ဘိက္ခု ကေသရ
ref: The Rise and Decline of Buddhism in India

အိန္ဒိယနိုင်ငံ ဗုဒ္ဓ၀ါဒ ကွယ်ပျောက်ခြင်း
=============================
ယခု ဘာသာပြန်နေတဲ့ စာအုပ်ကို ရေးသားတဲ့ စာရေးဆရာဟာ အိန္ဒိယနိုင်ငံ ကာလကတ္တား တက္ကသိုလ်က ပါဠိ ပါမောက္ခ ဒေါက်တာ ကာနိုင် လာ ဟဇ်ရ ဖြစ်ပါတယ်။ အိန္ဒိယနိုင်ငံမှာ ဗုဒ္ဓသာသနာ ကွယ်ပျောက်ခဲ့ရခြင်းရဲ့ အကြောင်းရင်း (၈) ချက်ကို ထုတ်နုတ်တင်ပြထားပြီး တစ်ချက်ခြင်းစီ ကို အဲဒီ ခေတ်ကာလအကြောင်းရေးသားထားတဲ့စာပေတွေကနေ ကောက်ချက်ဆွဲပြထားတယ်။ အဲဒီ ကောက်ချက်တွေကို ဖတ်ရတာ ထိတ်လန့်စ ရာတွေချည်းပါဘဲ။ စာအုပ် ရဲ့ အမည်က ‘‘အိန္ဒိယနိုင်ငံ ဗုဒ္ဓသာ သနာ ပေါ်ထွန်းခြင်းနှင့် ကွယ်ပျောက်ခြင်း’’ ဖြစ်ပြီး ၁၉၉၄ ခုနှစ်က ထုတ်ဝေထားတာဖြစ်တယ်။ သက်ဆိုင်ရာ ကျမ်းဂန်ကိုးကား ချက်တွေကတော့ စာမျက်နှာတိုင်းအပြည့်ဖြစ်တယ်။ ခုပြောမဲ့ သမိုင်းဆရာရဲ့ ကောက်ချက်တွေ မှန်မမှန်ကတော့ ဆက်လက် သုတေသန လုပ်ရမဲ့ ကိစ္စဖြစ်ပါတယ်။ မှန်သည်၊ မှားသည် ထက် ခုပြောတဲ့ သမိုင်းဆရာရဲ့ တင်ပြချက်တွေဟာ ဗုဒ္ဓဘာသာဝင် တွေအတွက် သမိုင်းသင်္ခမ်းစာ ယူသင့်တဲ့အချက်တွေ ပါဝင်နေတယ် လို့ ယူဆပါတယ်။ ဒါကြောင့် အကြောင်းရင်း (၈) ချက်ကို ဖော်ပြလိုက်ပါတယ်။
၁။ ဗုဒ္ဓဘာသာ ရဟန်းတော်များနှင့် ရဟန်းမများ ၀ိနည်းစည်းကမ်းလိုက်နာမူ လျော့ရဲလာခြင်း။
၂။ ဗုဒ္ဓ၀ါဒ ဂိုဏ်းများစွာ ကွဲထွက်ခြင်း။
၃။ မဟာယာန၀ါဒ၊ တန္တရ ၀ါဒ ဖွံ့ဖြိုးလာခြင်းနှင့် ဟိန္ဒူဝါဒ
ကိုးကွယ်ပူဇော်မူ ဓလေ့များ ဗုဒ္ဓ၀ါဒတွင် လွှမ်းမိုးစိမ့်ဝင်လာခြင်း။
၎။ ဗြာဟ္မဏ၀ါဒ၏ ဗုဒ္ဓ၀ါဒ အပေါ်ရန်လို တိုက်ခိုက်ခြင်းနှင့် ဗြာဟ္မဏ ဘာသာရေးခေါင်းဆောင်အချို့၏ အယူဆပိုင်းဆိုင်ရာ
အကြီးကျယ် ပြစ်တင်ရူံချ၍ စနစ်တကျ ဝေဖန်တိုက်ခိုက်ခြင်း။
၅။ ဗုဒ္ဓ၀ါဒအပေါ် အဆိုးမြင်ဝါဒ၊ ဒုက္ခ၀ါဒ ဟု ထင်မြင်လာကြခြင်း။
၆။ ဘာသာခြားမင်းတို့၏ ဖိနှိပ် ဖျက်စီးခြင်း။
၇။ မူစလင်များ ဖိနှိပ် ဖျက်စီးခြင်း။
၈။ အုပ်ချုပ်သူဘုရင်နှင့် မင်းစိုးရာဇာတို့၏ အထောက်ပံ့ မရခြင်း။
ဒီ အကြောင်းရင်း တစ်ချက်ခြင်းစီ ကို ဝေဖန်ပြထားတာ၊ ထိတ်လန့်စရာကောင်းပါတယ်။ ဆက်လက်ပြီး အချိန်ရသလောက် ဘာသာပြန် မျှဝေပါ့မယ်။
အားလုံး ကိုယ်စိတ်နှစ်ဖြာချမ်းသာကြပါစေ ..။
ဘိက္ခု ကေသရ
ref: The rise and decline of Buddhism in India
အိန္ဒိယနိုင်ငံ ဗုဒ္ဓ၀ါဒ ကွယ်ပျောက်ခြင်း
==============================
မဟာယာန ဗုဒ္ဓဘာသာဝင်တွေဟာ ဘုရားလောင်းကိုးကွယ်သူများနဲ့ မဟာယာန သုတ္တံ တရားတွေကို ရွတ်ဖတ်သရဇ္ဈယ်သူတွေ ဖြစ်တယ် လို့ အေဒီ (၇) ရာစု ဗုဒ္ဓ၀ါဒ အခြေနေကို ဝေဖန်တဲ့ သမိုင်းဆရာတွေ က ပြောကြပါတယ်။ မဟာယာန ဗုဒ္ဓ၀ါဒီ တွေဟာ ဗုဒ္ဓ၀ါဒမှာ ရုပ်ဆင်းတု ကိုးကွယ်တဲ့ ဓလေ့တွေ ၊ အန္တာရာယ်ကင်း မန္တာန်တွေ ရွတ်ဖတ်ပူဇော်တဲ့ ဓလေ့တွေ၊ ဘာသာရေး ပူဇော် ပွဲ အခမ်းအနားတွေကို စတင်ကျင့်သုံးခဲ့တယ်။ ဒီ လို ကျင့်သုံးရင်း တဖြည်းဖြည်းနဲ့ မဟာယာန ၀ါဒထဲမှာ ရိုးရာ ယုံကြည်မူတွေ ဟာ အရေးပါတဲ့ အခန်းကဏ္ဍတစ်ရပ် အဖြစ် ရောယှက်ဝင်ရောက် သွားခဲ့ပါတယ်။ အိန္ဒိယက ဗုဒ္ဓစာပေ ပညာရှင် လေမနိ ဂျိူ ရှီ ကတော့ အိန္ဒိယနိုင်ငံမှာ ဗုဒ္ဓ၀ါဒရဲ့ အရှိန်အ၀ါ ကျဆင်းသွားခဲ့ရတာဟာ ဟီနယာန (ထေရ၀ါဒ) ဗုဒ္ဓ၀ါဒ ရဲ့ အားနည်းချက်ကြောင့် ဆိုတာ ထက် မဟာယာန ဗုဒ္ဓ၀ါဒီ တွေရဲ့ ချို့ယွင်းအားနည်းချက်တွေ ကြောင့်ဖြစ်တယ် လို့ သုံးသပ်ထား ပါတယ်။
မဟာယာန ဗုဒ္ဓ၀ါဒ ပေါ်ထွန်းလာတဲ့ အတွက် ဗုဒ္ဓဘာသာဝင် အရေအတွက် တိုးပွားလာခဲ့တာကိုလက်ခံပေမဲ့ ဘာသာတရားရဲ့ အရည်အသွေး၊ ဂုဏ်ရည်လည်း ကျဆင်းသွားခဲ့ရပါတယ် တဲ့။ ဗုဒ္ဓမြတ်စွာ ဟာ ဗုဒ္ဓ၀ါဒ နဲ့ ပတ်သက်ပြီး ဘာသာရေး အခမ်းအနား တွေ တခမ်းတနား ဆင်ယင် ကျင်းပပူဇော်တဲ့ ဓလေ့ကို အမြဲလိုလို ကန့်ကွက် ရူတ်ချကြောင်းတွေ့ရပါ တယ်။ ဒါကြောင့်မို့လို့ အစောပိုင်း ခေတ် ဗုဒ္ဓ၀ါဒမှာ ဘာသာရေးပူဇော်ပွဲ အခမ်းနားတွေဟာ အရေးပါတဲ့ နေရာမှာ မရှိကြောင်း တွေ့ကြရ တာဖြစ်တယ်။ သို့သော် လည်း နှောင်းခေတ် ဗုဒ္ဓ၀ါဒ မှာ ဒီလို ပူဇော်ပွဲတွေဟာ နေရာယူလာပြီး တဖြည်းဖြည်းနဲ့ ဗုဒ္ဓ၀ါဒဟာ ဟိန္ဒူ ၀ါဒနဲ့ နီးစပ်လာခဲ့တယ်။ ဗုဒ္ဓ၀ါဒနဲ့ ဟိန္ဒူ ၀ါဒ ဟာ မကွဲမပြား၊ အရောရော အထွေးထွေးဖြစ် သွားခဲ့ရပါတယ်။ အဲဒီ ခေတ်က လူတွေဟာ ဗိရှနိုးနတ်ဘုရား ကို ကိုးကွယ်တာနဲ့ ဗုဒ္ဓ ကို ကိုးကွယ်တာ ဘာမှ မကွာ ခြားဘူး လို့ တွေးခေါ်လာခဲ့ကြသလို ရှီဝ နတ်ဘုရား၊ အ၀လောကိတ ဘုရားလောင်းနတ်နဲ့ တာရာ၊ ပါရ၀တီ နတ်တွေကို လည်း တတန်းတည်း သဘောထားခဲ့ကြတယ်။
မဟာ ယာန ဗုဒ္ဓ၀ါဒ ဟာ ဗြာဟ္မဏတွေရဲ့ ထောက်ပံ့မူနဲ့ ဖွံ့ဖြိုးအားကောင်းခဲ့တာ ဖြစ်တယ် လို့ အချို့သမိုင်းဆရာတွေက သုံး သပ်ကြပါတယ်။ တိဘက်သမိုင်းဆရာ တာရာနာထ က သူ့ရဲ့ သမိုင်းကျမ်းထဲမှာ ကူရှန်ခေတ် အတွင်းတုန်းက ၀ိဒူ အမည်ရှိ တဲ့ ဗြာဟ္မဏတစ်ယောက်ဟာ ပါဋလိပုတ်မှာ မဟာယာန ကျမ်းစာတွေရဲ့ မူပွားပေါင်း (၁၀၀၀) ကို ကူးယူးဖြန့်ဝေစေခဲ့တယ် လို့ ရေးသားထားတယ်။ ပြီးတော့ သူရသေန တိုင်းမှာ မဟာယန ဗုဒ္ဓ၀ါဒ ထွန်းကားပြန့်ပွားခဲ့ရတာ ဟာ အဓိကအားဖြင့် ကုလိက ဗြာဟ္မဏရဲ့ ပံ့ပိုးကူညီမူကြောင့်ဖြစ်တယ် လို့ ဆိုပါတယ်။ ဗြာဟ္မဏ ညီနောင်နှစ်ဦးဖြစ်တဲ့ သင်္ကရပတိနဲ့ မုဒဂရ တို့ဟာ မဟာယာန ဘုန်းကြီး မဟာဒေ၀ရဲ့ လမ်းညွှန်မူနဲ့ ဗုဒ္ဓ၀ါဒလမ်းစဉ် လွတ်မြောက်မူကို ရှာဖွေခဲ့တယ် လို့လည်း တွေ့ရတယ်။ အဿဃောသ ၊ အာရစတ၊ အာစရိယ ဇေတရိ၊ ရတန ၀ဇီရ၊ သင်္ကရာ နန္ဒ၊ အာစရိယ သီလဗဒြာ၊ ဓမ္မကိတ္တိ စတဲ့ ပုဂ္ဂိုလ်တွေဟာ ဗုဒ္ဓ၀ါဒီ တွေမဟုတ်ကြပါ ဘူး။ ဗြာဟ္မဏ၀ါဒီ တွေသာ ဖြစ်တယ်။ အဲဒီ ပုဂ္ဂိုလ်တွေဟာ မဟာယန၀ါဒ ယုတ္တိဗေဒ ဖွံ့ဖြိုးတိုးတက်အောင် အများကြီး အထောက်အပံ့ပြုခဲ့ကြတယ်။ ရှီဝ ၀ါဒီတွေဟာလည်း ဗုဒ္ဓ၀ါဒ ကို အများကြီး လွှမ်းမိုးခဲ့ကြောင်းတွေ့ကြရတယ်။ ဘာကြောင့်တုန်းဆိုတော့ တရုတ် ခရီးသွားရဟန်းတော် ရွှင်ကျန်ဟာ နာလန္ဒာက ဗုဒ္ဓ၀ါဒီ ဘုန်းတော်ကြီးတွေနဲ့ ရှီ၀၀ါဒီ ရသေ့ တွေဟာ ဘာမှ မကွာခြားသလိုဘဲ လို့ သြရိဿ ပြည်နယ်က ဗုဒ္ဓ၀ါဒီ ရဟန်းတော်တွေ ရဲ့ ဝေဖန်ပြောကြားမူကို ကြားခဲ့ရကြောင်း သူ့ရဲ့ ခရီးသွားမှတ်တမ်း မှာ ရေးသားထားလို့ဖြစ်တယ်။
မဟာယာန ဗုဒ္ဓ၀ါဒရဲ့ ပန်းတိုင်ဟာ ဘုရားလောင်းဖြစ်တယ်။ မဟာယန ဘုန်းတော်ကြီးတွေနဲ့ လူဝတ်ကြောင်တွေဟာ ဘုရား လောင်း ကျင့်စဉ်ကို ကွဲပြားခြားနားမူ မရှိဘဲကျင့်ကြံနိုင်ပါတယ်။ ရွှင်ကျန်၊ ကာလဟဏနဲ့ စစ-နာမ တို့ဟာ ‘‘အိမ်ထောင်သားမွေး’’ လုပ်တဲ့ မဟာယာန ဘုန်းတော်ကြီးတွေကို အဲဒီ ခေတ်မှာ တွေ့ရှိရကြောင်းမှတ်တမ်းတင်ထားတယ်။ ဂျိုရှီကတော့ အဲဒီ ဘုရား လောင်းဝါဒ ဟာ အိမ်ထောင်ပြုတဲ့ ဘုန်းကြီးဂိုဏ်းကို ဖြစ်ပေါ်စေခဲ့ပုံ ရတယ် လို့ သုံးသပ်ပါတယ်။ မဟာယန ဗုဒ္ဓ၀ါဒီတွေဟာ အစောပိုင်းခေတ် ဗုဒ္ဓ၀ါဒမှာ လက်မခံခဲ့တဲ့ အလေ့အထတွေ၊ အယူဝါဒတွေကို စတင်လက်ခံကျင့်သုံးယူဆခဲ့ကြောင်း တွေ့ကြ ရတယ်။ အစောပိုင်းခေတ် ဗုဒ္ဓ၀ါဒမှာ ပုဂ္ဂိုလ်ရေး ဆည်းကပ်ကိုးကွယ်မူတွေ၊ တန်ခိုးအစွမ်းနဲ့ ဆိုင်တဲ့ ဘာသာရေး ပူဇော်ပွဲ အခမ်းနားတွေ၊ နတ်သား၊ နတ်သမီးတွေကို အရေးတကြီးကိုးကွယ်မူတွေကို မတွေ့ကြရပါဘူး။ သို့သော်လည်း မဟာယာန ဗုဒ္ဓ၀ါဒီတွေကတော့ ဒီလို အလေ့အထတွေကို ဗုဒ္ဓ၀ါဒရဲ့ အရေးကြီးတဲ့ အခန်းကဏ္ဍအဖြစ် စတင်ကျင့်သုံးခဲ့ကြတယ်။ သူတို့ဟာ ဗုဒ္ဓ၀ါဒကို အကြီးအကျယ် ပြောင်းလဲပစ်လိုက်တယ်။ ဒီလို ပြောင်းလဲကျင့်သုံးမူတွေက ဗုဒ္ဓ၀ါဒကို သာမာန်လူတွေနဲ့ ပိုပြီးနီးစပ်သွားစေတယ်လို့ ဆိုနိုင်ပေမဲ့ ခေတ်ကာလ ရှည်ကြာတဲ့အခါ ဒီကျင့်သုံးမူတွေက ဗုဒ္ဓ၀ါဒရဲ့ မူလသဘောတရား၊ အယူအဆတွေနဲ့ မူလအနှစ်သာရတွေကို ပျောက်ဆုံးသွားစေခဲ့ပါတယ်။
အေဒီ (၈) ရာစုနဲ့ (၉) ရာစုဟာ ဗုဒ္ဓ၀ါဒ မှာ အရေးပါတဲ့ ရာစုနှစ်တွေဖြစ်ပါတယ်။ ဒီရာစုနှစ်တွေကစပြီး နောက်ပိုင်းမှာ ဗုဒ္ဓ၀ါဒ ဟာ အပြောင်းလဲတွေ စတင် ဖြစ်ပေါ်ခဲ့ကြောင်းတွေ့ကြရလို့ဖြစ်တယ်။ မန္တာန်ရွတ်ဖတ်မူတွေ၊ ဓါရဏီဓလေ့တွေ၊ မုဒြာ အယူအဆ တွေ၊ မဏ္ဍလ သဘောတရားတွေနဲ့ အခြား တန္တရ ဓလေ့ထုံးတမ်းတွေကို အဲဒီခေတ် မဟာယာန ဗုဒ္ဓ၀ါဒမှာ စတင်လက်ခံကျင့် သုံးခဲ့တာဖြစ်တယ်။ ခေတ်ကာလ ရှည်ကြာလာတာနဲ့ တန္တရ ကိုးကွယ်မူ ဓလေ့ထုံးတမ်းတွေဟာ မဟာယာန ဗုဒ္ဓ၀ါဒမှာ အရေး ပါတဲ့ အခန်းကဏ္ဍ ဖြစ်လာခဲ့တယ်။ ပြီးတော့ ဗုဒ္ဓ၀ါဒ တစ်ခုလုံးကိုလည်း သိသာစွာ လွှမ်းမိုးခဲ့တယ်။ ဆိုခဲ့တဲ့ တန္တရ၀ါဒ ဓလေ့ထုံး တမ်းတွေကို အဓိက အားပြုလာတဲ့ မဟာယာန ဗုဒ္ဓ၀ါဒ ဂိုဏ်းဟာ တန္တရ မဟာယာန ဗုဒ္ဓ၀ါဒ ဂိုဏ်းအဖြစ် ထင်ရှားလာခဲ့တယ်။
အဲဒီ တန္တရ၀ါဒ ဟာ နှောင်းခေတ်မှာ ပဉ္စလက်ဝါဒ၊ လိင်မူဆိုင်ရာကိုးကွယ်မူ ၀ါဒနဲ့ တဆူတည်းသော ဘုရားသခင်ဝါဒ စသည်ဖြင့် ကိုးကွယ်မူ ၀ါဒ တွေ ရောယှက်ပါဝင်ခဲ့ကြောင်းလည်း တွေ့ကြရတယ်။ အရိုင်းဆန်တဲ့ ကျင့်သုံးမူဓလေ့များစွာနဲ့ စိတ်ကူးပေါက်ရာ အယူအဆတွေလည်း ဗုဒ္ဓ၀ါဒ အတွင်းဝင်ရောက်ခဲ့တယ်။ ဒီလို ဓလေ့၊ အယူတွေဟာ ဗုဒ္ဓ၀ါဒတစ်ခုလုံးကို ထိခိုက်စေခဲ့ရုံတင်မက ဘူး ဗုဒ္ဓ၀ါဒီ ရဟန်းသံဃာတော်တွေရဲ့ ၀ိနည်းစည်းကမ်းလိုက်နာမူကိုလည်း ဆိုးဆိုးဝါးဝါး ပျက်ပြားစေခဲ့တယ်။ ဒါတင်မကဘူးအစောပိုင်းခေတ် ဗုဒ္ဓ၀ါဒရဲ့ မူလ သဘောတရားနဲ့ လိုက်နာကျင့်ကြံမူတွေကိုလည်း အကြီးအကျယ် ပြောင်းလဲသွားစေခဲ့တယ်။
ပါလ မင်းဆက် ခေတ်ကာလ အတွင်း အိန္ဒိယနိုင်ငံက ဗုဒ္ဓ၀ါဒဟာ တန္တရ၀ါဒ အဖြစ် ပြောင်းလဲသွားခဲ့ပါတယ်။ အဲဒီ တန္တရ ဗုဒ္ဓ၀ါဒကနေ ထပ်မံပြီး မန္တရယာန ဗုဒ္ဓ၀ါဒ ပေါ်ပေါက်ခဲ့တယ်။ အဲဒီ နောက်တစ်ခါတည်း ၀ဇီရ ယာန၊ သဟဇ ယာန၊ ကာလစကြယာန ဗုဒ္ဓ၀ါဒ စသည်ဖြင့် ၀ါဒ အမျိုးမျိုး ဖြစ်ပေါ် လာခဲ့ပြီး မူလ ဗုဒ္ဓ၀ါဒ ကိုအားနည်းယုတ်လျော့သွားစေခဲ့တယ်။ ဒါကြောင့်မို့ အဲ ဒီ ခေတ်ကာလ မှာ ဗုဒ္ဓ၀ါဒဟာ ကိုးကွယ်သူ နည်းပါးလာခဲ့ပြီး ဗြာဟ္မဏ၀ါဒ ဟာ ထွန်းကားပြန့်ပွားလာခဲ့တာဖြစ်တယ်။
တဖြည်းဖြည်းနဲ့ ဟိန္ဒူဝါဒ ကိုးကွယ်ပူဇော်မူ ဓလေ့ထုံးစံတွေဟာ ဗုဒ္ဓ၀ါဒ မှာ အထူးအရေးပါထင်ရှားလာခဲ့တယ်။ ဒီ အချက်ဟာ မူလ ဗုဒ္ဓ၀ါဒ ကို အားနည်းယုတ်လျော့စေခဲ့ပြီး ဗုဒ္ဓ၀ါဒ ပျောက်ကွယ်ဖို့ အတွက် နိမိတ်ဆိုးဖြစ်စေခဲ့ပါတယ်။ တန္တရ ဗုဒ္ဓ၀ါဒနဲ့ ရှီဝ ၀ါဒ၊ သာကတ တန္တရ ၀ါဒ တွေဟာ ထူးမခြားနား ဖြစ်လာခဲ့တယ်။ တန္တရ ဗုဒ္ဓ၀ါဒီ တွေဟာ ဟိန္ဒူဝါဒီ တွေလိုဘဲ ‘‘သာကတ ပီဌ’’ ဒေသ တွေကို မြင့်မြတ်တဲ့ ဒေသတွေလို့ လက်ခံလာခဲ့ကြတယ်။ ၀ဇီရ ယာန ဗုဒ္ဓ၀ါဒ ဟာ မူလ ဗုဒ္ဓ၀ါဒ နဲ့ ဖြောင့် ဖြောင့်ကြီး ကွဲပြားခြားနား သွားခဲ့ပါတယ်။ ဥပမာ ၀ဇီရ ယာန ကျမ်းဂန်တစ်ခု မှာ လွတ်မြောက်မူကို ယခု မျက်မှောက်ဘ၀ မှာ ဘဲ သံသရာရဲ့ အကူညီနဲ့ ရရှိနိုင်ပြီး အဲဒီ သံသရာ ဟာ နိဗ္ဗာန် ဖြစ်တယ် လို့ ရေးသားထားပါတယ်။ ၀ဇီရယာန မှာ ငါးပါး သီလရဲ့ အခန်းကဏ္ဍ မရှိတော့ပါဘူး။ ‘‘ပဉ္စမကာရ’’ သဘောတရားနဲ့ ဘာသာရေးပူဇော်မူ အခမ်းအနား ငါးရပ် ဟာ ငါးပါးသီလ ရဲ့ နေရာမှာ အစားထိုးဝင်ရောက်ခဲ့ တယ်။ ၀ဇီရယာန ဟာ ‘‘မဟာသုခ’’ သဘောတရားကို အရေးတကြီး ရှေ့တန်းတင်ထားပြီး အဲဒီ မဟာသုခ ကို ယောဂိနိ နဲ့ ဘာသာရေး ဆိုင်ရာ ပေါင်းစပ်ခြင်းအားဖြင့် ရရှိနိုင်တယ် လို့ ဆိုထားပါတယ်။ ဂျိူ ရှီ ရဲ့ စကားနဲ့ မှတ်ချက်ပြုရ ရင်တော့ အစောပိုင်းခေတ် ဗုဒ္ဓ၀ါဒ ရဲ့ အကြောင်းအကျိုးဆင်ခြင်မူ၊ သဘောအမှန်အတိုင်း ထိုးထွင်းသိမြင်ခြင်းဆိုင် ရာ ပွားများလေ့ကျင့်မူ တွေပျောက်ကွယ်သွားခဲ့ပြီး အယူးသီး တဲ့ မှော်၊ ပျောက်စေ၀ါဒနဲ့ လိင်၊ အာရုံခံစားမူ လျှိုဝှက် ဆန်းကြယ် တဲ့ ကိုးကွယ်မူ ၀ါဒ အဖြစ်ပြောင်းလဲသွားခဲ့တယ်။ ဥပမာ အစောပိုင်း ဗုဒ္ဓ၀ါဒမှာ ရာဂ တရားကို အဆိုးဆုံး မီး အဖြစ်ဟောကြား ထားခဲ့ပေမဲ့ ၀ဇီရ ယာန ဗုဒ္ဓ၀ါဒ ကတော့ အဆင့်မြင့်တဲ့ ချမ်းသာပျော်ရွှင်မူ အဖြစ်လက်ခံယူဆ ထားပါတယ်။ အချုပ်ပြောရရင် တော့ မဟာယာန ဗုဒ္ဓ၀ါဒီတွေဟာ ဗုဒ္ဓ၀ါဒကို လူကြိုက်များစေဖို့အတွက် အစောပိုင်းခေတ် ဗုဒ္ဓ၀ါဒ မှာ လုံးဝ လက်မခံခဲ့တဲ့ ကျင့်သုံးမူတွေကို စတင်လက်ခံ ကျင့်သုံးခဲ့ကြတယ်။
ဗုဒ္ဓ၀ါဒအတွင်းမှာ ဟိန္ဒူ ၀ါဒ ကိုးကွယ်ပူဇော်မူ ဓလေ့တွေကို လက်ခံကျင့်သုံးခြင်းနဲ့ ၀ဇီရယာန ဗုဒ္ဓ၀ါဒီတွေရဲ့ တလွဲကျင့်သုံးမူ၊ ကိုးကွယ်ပူဇော်မူတွေဟာ အစောပိုင်းခေတ် ဗုဒ္ဓ၀ါဒက ဦးတည်ခဲ့တဲ့ ဘာသာရေး ပန်းတိုင်တွေ ပျောက်ဆုံးစေခဲ့ပြီး ဒီအချက်တွေ ဟာ အိန္ဒိယ နိုင်ငံမှာ ဗုဒ္ဓ၀ါဒ ကျဆုံးစေခဲ့တဲ့ အကြောင်းရင်းတွေထဲက တစ်ခုသော အကြောင်းရင်းဖြစ်စေခဲ့တယ်။
-ဆက်ရန်-
ဘိက္ခု ကေသရ
ref: The Rise and Decline of Buddhism in India

အိန္ဒိယနိုင်ငံ ဗုဒ္ဓ၀ါဒ ကွယ်ပျောက်ခြင်း ...
================================
ဗြာဟ္မဏ တွေရဲ့ ဗုဒ္ဓ၀ါဒ အပေါ်ရန်လို အမုန်းထားမူ ဟာလည်း အိန္ဒိယမှာဗုဒ္ဓ၀ါဒကွယ်ပျောက်ခြင်းရဲ့ အကြောင်းရင်းတစ်ခု ဖြစ်တယ်။ နှောင်းခေတ် ဗြာဟ္မဏ၀ါဒမှာ ဗုဒ္ဓကို အ၀တာရ ကိုယ်ပွားဘုရား တစ်ဆူအဖြစ် လက်ခံခဲ့တာ မှန်ပေမဲ့ ဗြာဟ္မဏတွေ ဟာဗုဒ္ဓ၀ါဒီတွေကိုရင်းနှီးဖော်ရွေခဲ့တယ်၊ နှစ်သက်ခဲ့ တယ်ဆိုတဲ့ လက္ခဏာမျိုးကိုတော့ မတွေ့ကြရဘူး။ သူတို့ဟာ ဗုဒ္ဓ၀ါဒီ တွေကို အမြဲလိုလို ရန်ရှာ အမုန်းထားခဲ့ကြောင်းသာတွေ့ကြရတယ်။ ဗုဒ္ဓမြတ်စွာ သက်ရှိထင်ရှား ရှိစဉ်ကာလ ကတည်းက စပြီး သူတို့ဟာ ဗုဒ္ဓမြတ်စွာ နဲ့ ဗုဒ္ဓ၀ါဒ ကိုဆိုးဆိုးဝါးဝါး အမုန်းထားကြကြောင်းကျမ်းဂန်မှတ်တမ်းတွေမှာ တွေ့ကြရတယ်။
ခုဒ္ဒကနိကာယ် မှာ ကာသိဘာရဒွါဇ ဗြာဟ္မဏဟာ ဗုဒ္ဓကို မချေမငံ ဆက်ဆံကြောင်းတွေ့ရတယ်။ အဂ္ဂိက ဘာရဒွါဇ ဗြာဟ္မဏက တော့ ဗုဒ္ဓမြတ်စွာကို ‘‘ဇာတ်နိမ့်’’ လို့ နှိမ့်ချ ခေါ်ဝေါ်ကြောင်းလည်း တွေ့ရပါတယ်။ သံယုတ္တနိကာယ်မှာတော့ ဗြာဟ္မဏရွာ ဟာ ဗုဒ္ဓမြတ်စွာကို ဆွမ်း တစ်စေ့မှ မလောင်းလှူဘူး လို့ ဆိုပါတယ်။ ဒီဃနိကာယ် မှာ သောဏဒဏ္ဍ ဗြာဟ္မဏဟာ သူ့ရဲ့ ဗြာဟ္မဏ အသိုင်းဝိုင်းက သူ့ကို ပြစ်တင် ကဲ့ရဲ့မှာ စိုးရိမ်တဲ့အတွက် ဗုဒ္ဓမြတ်စွာကို ဖူးတွေ့ဖို့ တုံ့ဆိုင်းခဲ့ရကြောင်း မှတ်တမ်းတင်ထားတယ်။ ရှင်မောဂ္ဂလာန် ဟာ တိတ္ထိတွေ သို့မဟုတ်ရင် ဗြာဟ္မဏ၀ါဒီတွေရဲ့ သတ်ဖြတ်တာကို ခံခဲ့ရကြောင်း ဓမ္မပဒ အဋ္ဌကထာမှာရေးသားထားတယ်။
ဂေါတမီပုတြ သာတကရာနီ ဘုရင်ဟာ ဗုဒ္ဓ၀ါဒီတွေကို ဆန့်ကျင်နှိမ်နင်းဖို့ ဆောင်ရွက်ခဲ့ကြောင်းတွေ့ရတယ်။ ဒီ ဘုရင်ဟာ အမြဲတမ်း သူ့ကိုယ်သူ အတုမရှိ ဗြာဟ္မဏလို့ ဆိုလေ့ရှိပြီး ခတ္တိယတွေရဲ့ မာနကို နှိမ် ချိူးခဲ့ရုံမျှ မကဘူး ဇာတ်ရောနှောမူကိုလည်း တားမြစ် ပိတ်ပင် ခဲ့တယ်။ ရွှင်ကျန်ဟာ သူ့ရဲ့မှတ်တမ်းထဲမှာ သာတ၀ါဟန ဘုရင်တပါးဟာ ဗုဒ္ဓ၀ါဒ ကျမ်းတတ် ရဟန်းတော် တပါး ဖြစ်တဲ့ နာဂဇုန ကို သတ်ခဲ့တယ် လို့ ရေးသားထားတယ်။ အဲဒီ သတ်ခဲ့တဲ့ ဘုရင်ဟာ ဂေါတမီပုတြာ ဘုရင်ဖြစ်ကြောင်း ဂျိုရှိက ထုတ်ဖော်ရေးသားပြီးဖြစ်တယ်။ ရာမာယဏဇာတ်ထဲက အယောဓယ ကဏ္ဍမှာ ဗုဒ္ဓကို ဘုရားမဲ့ ၀ါဒီ အဖြစ် ရေးသားထား တယ်။ ရာဂျန၀ါလ်ကျ ကျမ်းမှာ တော့ အ၀ါရောင် သင်္ကန်းကို ၀တ်ဆင်ထားတဲ့ ဗုဒ္ဓ၀ါဒီ ရဟန်းတစ်ပါးကို မြင်တွေ့ရခြင်းဟာ အိပ်မက်ထဲ မှာ မြင်တွေ့ရင်တောင် မကောင်းတဲ့ အတိတ် နိမိတ်ဖြစ်ပြီး ဝေးဝေးရှောင်ခြင်းဟာ အကောင်းဆုံးဖြစ်တယ် လို့ ဆို ထားပါတယ်။ ဗြာဟ္မဏာရာဒိယ ပုရာဏ်ကျမ်းမှာတော့ ဗြာဟ္မဏ တစ်ယောက်ဟာ ဘေးအန္တာရာယ်နဲ့ ကြုံတွေ့လို့ ဗုဒ္ဓဘာသာ ၀င်တစ်ဦးရဲ့ အိမ်အတွင်းဝင်ရောက်မိရင်တောင် အပြစ်ကြီးတစ်ခု ကျူးလွန်မိတာ ဖြစ်တယ် လို့ ဆိုထားတယ်။ အဂ္ဂိပုရာဏ် ကျမ်းကတော့ သုဒ္ဓေါဒန ဘုရင်ရဲ့သားဟာ နတ်ဆိုးတွေရဲ့ လှည့်ဖြားမူကြောင့် ဘုရားဖြစ်အောင် ကြိုးစားခဲ့တယ် လို့ ပြောထား တယ်။ သွားက ဖြူဖြူ၊ မျက်လွှချထားလျက်၊ ဦးပြည်း သင်္ကန်းအနီရောင်နဲ့ ဇာတ်နိမ့်တွေဟာ သူတို့ဘာသာရေး အမူတွေကို ဆောက်ရွက်လေ့ရှိတယ် လို့ ၀ါယု ပုရာဏ်ကျမ်းကတော့ ဗုဒ္ဓ၀ါဒီ ရဟန်းတွေကို နှိမ့်ချရေးသားထားတယ်။ ဗိရှနိုး ပုရာဏ်ကျမ်း မှာ ဗုဒ္ဓ ဟာ အကြီးအကျယ်သွေးဆောင်ဖြားယောင်းသူဖြစ်တယ်။ ဒါကြောင့် မဟာမောဟ လို့အမည်ထင်ရှားတယ်။ သူဟာ နတ်ဆိုးတွေကို လှည့်ဖြားပြီး အဟိံသ၀ါဒနဲ့ နိဗ္ဗာန် သဘောတရားတွေကို သင်ကြားခဲ့တယ်။ လူတွေကို ဝေဒ ကျင့်ဝတ်တွေနဲ့ ဝေဒ ဘာသာ တရားကနေ ကင်းကွာအောင် လုပ်ခဲ့တယ်။ မဟာမောဟ ကို ကိုးကွယ်တဲ့ သူတွေဟာ နောက်ဆုံးမဟာမောဟ ကို ကိုးကွယ်တဲ့ သူတွေဟာ နောက်ဆုံးမှာ နတ်တွေရဲ့ ဖျက်စီးခြင်း ကို ခံခဲ့ရတယ် လို့ ရေးသားထားပါတယ်။ ရှရီမဒ် ဘာဂ၀တ် ကျမ်းကတော့ ဗုဒ္ဓ၀ါဒကို မှားယွင်းတဲ့ ၀ါဒ လို့ဆိုတယ်။ နာမည်ကျော် ယုတ္တိဗေဒ ကျမ်းဆရာ ဂနေသောပါဒယာယ ဟာ သူ့ရဲ့ကျမ်းဂန်ထဲမှာ ဗုဒ္ဓ၀ါဒီ တွေကို ပရစဏ္ဍ ပါသဏ္ဍ လို့ သုံးထားတယ်။ ဥဒ ယာန ရဲ့ ကျမ်းတစ်ကျမ်းအမည်ဟာ ဗုဒ္ဓ ဒိက္ကာရ ဖြစ်တယ်။ ဒီ စကားလုံးဟာ ဗုဒ္ဓ၀ါဒ အပေါ်မှာ သူ့ရဲ့ ရန်လို မုန်းထားမူ ကို ဖော်ပြနေတယ်။ ဒိက္ကာရ ဟာ ပြစ်တင်ရူတ်ချမူ လို့ ဆိုလိုတယ်။ ကရဏပုရာဏ်ကျမ်း မှာတော့ တောင်ပိုင်းက ဗုဒ္ဓ၀ါဒီ တွေဟာ ပါသဏ္ဍ သူယုတ်တွေ ဖြစ်တယ် လို့ ဆိုထားတယ်။
ဗုဒ္ဓ၀ါဒဟာအိန္ဒိယနိုင်ငံတောင်ပိုင်းမှာလည်း ဗြာဟ္မဏ၀ါဒီဘာသာရေးခေါင်းဆောင်တွေနဲ့ တရားဟောဆရာတွေရဲ့ ရူတ်ချ ဟောပြောမူတွေကြောင့် အရှိန်အ၀ါ ကျဆင်းခဲ့ရတယ်။ အဲဒီ အထဲမှာ ကုမာရိဠ ဘဋ္ဋဟာ အပြင်းထန်ဆုံးဖြစ်တယ်။ သူဟာ ဝေဒ ပူဇော်ကိုးကွယ်မူ၊ ဝေဒ ဘာသာရေးနဲ့ ဗြာဟ္မဏတွေရဲ့ သာလွန် မြင့်မြတ်မူ ကို အစွမ်းဆုံး ဟောပြောခဲ့သူဖြစ်တယ်။ ဗုဒ္ဓ၀ါဒ ကို ပျောက်ကွယ် မသွားစေခဲ့ရင်တောင် အလဲထိုး ရူံးနိမ့်စေခဲ့တဲ့ တစ်ကျော့ပြန်ထွန်းကားလာတဲ့ ဟိန္ဒူဝါဒဟာ ကုမာ ရိဠ ဘဋ္ဋ (အေဒီ ၇၅၀) နဲ့ သင်္ကရ (အေဒီ ၈၀၀) တို့ရဲ့ အမည်တွေနဲ့ ဆက်စပ်နေတယ် လို့ စီ. အီးလီးယက် က သုံးသပ်ပြထား ပါတယ်။
သလောက၀ါရတ္တိက ကျမ်းမှာ ကုမာရိဠ ဟာ ဝေဒ ဘာသာရေးဆိုင်ရာ ပူဇော်မူ အခမ်းနားတွေမှာ အထူးကျွမ်းကျင်လိမ္မာကြောင်း
ဗုဒ္ဓ၀ါဒ သဘောတရားတွေကို မှားယွင်းဖောက်ပြန်တယ် လို့ ပုံဆောင်သက်သေပြခဲ့ကြောင်း ရေးသားထားတယ်။ ပြီးတော့ သူဟာ ဗုဒ္ဓဘာသာဝင် တွေ ဘာသာကိုးကွယ်မူကြောင့် သတ်ဖြတ်ခံခဲ့ရတဲ့ ကိစ္စမှာ အရေးပါတဲ့ နေရာက တာဝန်ရှိခဲ့ကြောင်း သိရတယ်။ ဥဇ္ဇေနီပြည် ဘုရင် သုဓန၀န ဟာ သူ့ရဲ့ အကြံပေးချက်ကြောင့် ဗုဒ္ဓဘာသာဝင် များစွာကို သတ်ခဲ့တယ် လို့လည်း တွေ့ရပါတယ်။ မာဓ၀ ရဲ့ သံကရဒိဂ်ဝိဇယကျမ်းနဲ့ အာနန္ဒာ ဂိရိ ရဲ့ သံကရ၀ိဇယ ကျမ်းတွေမှာ သုဓန၀န ဘုရင်ဟာ ကုမာရိဠ ရဲ့ လှုံဆော်တိုက်တွန်းမူကြောင့် ဗုဒ္ဓဘာသာဝင်များစွာကို ဘာသာတရား ကိုးကွယ်မူ အကြောင်းပြုပြီး သတ်ခဲ့တယ် လို့ တွေ့ရပါတယ်။ ရွှင်ကျန်ရဲ့ ခရီးသွားမှတ်တမ်းမှာတော့ ဥဇ္ဇေနီပြည်မှာ ၀ါဒအယူရေးရာနဲ့ ပတ်သက်ပြီး အလွန်ကျွမ်းကျင်နှံ့စပ် တဲ့ ဗြာဟ္မဏတစ်ဦး အုပ်ချုပ်စိုးစံနေတယ်၊ သူဟာ ဗုဒ္ဓ၀ါဒီ မဟုတ်ဘူး လို့ ရေးသားထားတယ်။ မရ စ္ဆက ဋီကာ ကျမ်းမှာတော့ ဗုဒ္ဓ၀ါဒီ ရဟန်းတော်တွေကို ဥဇ္ဇေနီဘုရင်ရဲ့ယောက်ဖတော်ကနှောက်ယှက်တိုက်ခိုက် တယ်လို့ ဆိုထားတယ်။ သံကရဒိဂ်ဝိဇယ ကျမ်း၊ သံကရ ၀ိဇယကျမ်း၊ ရွှင်ကျန်ရဲ့ ခရီးသွားမှတ်တမ်းနဲ့ မရ စ္ဆက ဋီကာ အရ ဥဇ္ဇေနီပြည်မှာ ဗုဒ္ဓ၀ါဒီ တွေ ဟာ ဗြာဟ္မ ဏတွေရဲ့ ပြောင်ပြောင်တင်းတင်း ဆန့်ကျင့်မူကို ခံခဲ့ရတယ် လို့ ဖော်ပြနေ ပါတယ်။ ကေရလပြည်ရဲ့ သမိုင်းကို ရေးသားထားတဲ့ ကေရလ ဥတ္ပတ္တိကျမ်းမှာလည်း ကေရလပြည်က ဗုဒ္ဓဘာသာဝင်များစွာ သတ်ဖြတ်ခံခဲ့ရတာဟာ ကုမာရိဠရဲ့ စနက်မကင်းကြောင်းရေး သားထားတယ်။ ဒါကြောင့်မို့လို့ သက္ကတစာပေပညာရှင် ဂေါပိနာထ က၀ိရာဇက ကုနာရိဠ ဟာ ဗုဒ္ဓ၀ါဒရဲ့ သြဇာအရှိန်အ၀ါကို အိန္ဒိယနိုင်ငံမှာ ကျဆင်းစေခဲ့တဲ့ စွမ်းအားအထက်ဆုံး တိုက်ဖျက်ရေးအင်အားစုတွေထဲက တစ်ဦးဖြစ်ခဲ့တယ် လို့ ဆိုထားပါတယ်။
သံကရာစာရ်ယ သို့မဟုတ် သင်္ကရ ဟာ အိန္ဒိယနိုင်ငံတောင်ပိုင်းက ဗြာဟ္မဏတစ်ဦးဖြစ်ပြီး ဝေဒ နဲ့ ဝေဒန္တ၀ါဒ ထွန်းကားတောက် ပအောင် အကြီးအကျယ်ဆောင်ရွက်ခဲ့သူ ဖြစ်တယ်။ ပြီးတော့ ဗုဒ္ဓ၀ါဒကို ဆန့်ကျင်ခဲ့သူလည်းဖြစ်ပါတယ်။ သူ့ရဲ့ သရင်္ဂေရီ ဟိန္ဒ္ဒူ ဘုန်းကြီးကျောင်းကို ဗုဒ္ဓဘာသာ ဘုန်းကြီးကျောင်းဟောင်း တစ်ကျောင်းနေရာပေါ်မှာ တည်ဆောက်ခဲ့တယ်။ သူ့အကြောင်း အတ္ထုပ္ပတ္တိတွေ မှာ သူ ဟာ ဗုဒ္ဓ၀ါဒ ဆန့်ကျင်ရေး လှုပ်ရှားမူတွေဆောင် ရွက်ခဲ့ကြောင်း၊ ပြီးတော့ ဟိမ၀န္တာဒေသ ကနေ အိန္ဒိယ သမုဒ္ဒရာ တစ်လျှောက်ထိ ဗုဒ္ဓဘာသာဝင်များစွာ သတ်ဖြတ်ခံခဲ့ရခြင်းနဲ့ ပတ်သက်ပြီး အရေးပါတဲ့နေရာက ပါဝင်ခဲ့ကြောင်းရေး သားထားပါတယ်။ သူ့ရဲ့ ဗုဒ္ဓ၀ါဒ ဆန့်ကျင်ရေးလှုပ်ရှားမူတွေကြောင့် ဗုဒ္ဓ၀ါဒဟာ ကံဆိုးမိုးမှောင်ကျခဲ့ရတယ်။ ဗုဒ္ဓဘာသာ ဘုန်းကြီးကျောင်းတွေဟာ သူ့လက်အောက်မှာ ထိတ်လန့် တုန်လှုပ်ခဲ့ကြရပြီး ၊ ဗုဒ္ဓဘာသာ ရဟန်းတော်တွေဟာ ကစဉ်ကလျား ထွက်ပြေးခဲ့ရတယ် လို့ ဆိုပါတယ်။ သို့သော်လည်း အချို့ သမိုင်းပညာရှင်တွေ ဟာ သင်္ကရ ဗြာဟ္မဏဟာ ဗုဒ္ဓ၀ါဒကို ဘယ်တုန်းက မှ မဆန့်ကျင်ခဲ့ဘူး၊ ဆန့်ကျင်ရေး လှုပ်ရှားမူတွေ ဘယ်တုန်းကမှ မလုပ်ခဲ့ဘူး လို့ ပြောကြပါတယ်။ အာစီ မိတြကတော့ သင်္ကရရဲ့ရေးသားမူတွေထဲမှာဗုဒ္ဓဘာသာဝင်တွေကိုထူးထူးခြားခြားအမုန်းထားတယ် ဆိုတာ မတွေ့ရဘူး လို့ ဆိုထားပါတယ်။ သို့ပေမဲ့ ဗြာဟ္မဏသုတ္တ သင်္ကရဘာသယ ကျမ်းထဲမှာ သင်္ကရဗြာဟ္မဏရဲ့ ဗုဒ္ဓ၀ါဒ ဆန့်ကျင်ရေး ၀ါဒကို တွေ့နိုင်ပါတယ်။ အဲဒီကျမ်း ထဲမှာ ‘‘ဗုဒ္ဓဟာ လူထုရဲ့ ရန်သူဖြစ်တယ်၊ သူဟာအကြောင်းအကျိုးညီညွတ်မူမရှိတဲ့ ၊ နားလည်ရခက်ခဲတဲ့ တရားတွေ ကိုဟော ကြားခဲ့တယ်’’ လို့ ရေးသားပါရှိပါတယ်။

ဆိုခဲ့ပြီးတဲ့ အကြောင်းရာတွေကို ချုပ်လိုက်ရင် ကုမာရိဠ ဘဋ္ဋနဲ့ သင်္ကရ ဗြာဟ္မဏတို့ရဲ့ ပြင်းထန်တဲ့ ဗုဒ္ဓ၀ါဒ ဆန့်ကျင်ရေး လှုံဆော်မူတွေကြောင့် အိန္ဒိယနိုင်ငံက ဒေသတော်တော်များများမှာ ဗုဒ္ဓ၀ါဒ ကွယ်ပျောက်ခဲ့ရတယ် လို့ ကောက်ချက်ဆွဲရမှာ ဖြစ်တယ်။ အေဒီ (၁၂) ရာစု အစောပိုင်းမှာ ပဉ္စာလတိုင်းက ဗောဍမာယုဋာ ကို မရောက်လာခင် ၀ါရမသီဝ တစ်ဦးဟာ တောင် ပိုင်းဒေသက ဗုဒ္ဓဆင်းတုတော် တစ်ဆူကို ဖျက်ဆီးခဲ့ကြောင်း ဂုဏ်ယူဝံ့ကြွားစွာ ပြောဆိုထားတာကို ဗောဒန် ကျောက်စာမှာ တွေ့ရတယ်။

စာလုကျကျောက်စာမှာတော့ ၀ီရပုရုသ လို့ခေါ်တဲ့ မြေပိုင်ရှင် အကြီးကဲ တစ်ဦးဟာ ဗုဒ္ဓ၀ါဒကို ရန်လိုမုန်းထား ဆန့် ကျင်ခဲ့ကြောင်း၊ သူကြောင့် ဗုဒ္ဓ၀ါဒဟာ အဲဒီ အရပ်မှာ မထွန်းကားခဲ့ကြောင်းနဲ့ သူဟာ ပလ္လင်ပေါ်မှာ ရှီဝ ရဲ့ လိင်အင်္ဂါကို ကိုးကွယ်ခဲ့ကြောင်း ရေးသားထားတယ်။ ၀င်္ဂါလ စစ်တပ်ဟာ သောမပုရမှာ ရှိတဲ့ နာမည်ကျော် ဗုဒ္ဓဘာသာ ဘုန်းကြီးကျောင်းရဲ့ တစ်စိတ်တစ်ပိုင်းကို မီးရိူ့ ဖျက်စီးခဲ့ကြောင်း၊ ဒီ ဖျက်စီးမူကြောင့် ကရုဏာမိတြာဘွဲ့တော်ရှိတဲ့ ရဟန်းတစ်ပါး ပျံလွန်ခဲ့ကြောင်း မှတ်တမ်းတစ်ခု မှာ ဖော်ပြထား တယ်။ ဒါကြောင့်မို့ လို့ ဗြာဟ္မဏတွေရဲ့ ဗုဒ္ဓ၀ါဒအပေါ် ရန်လိုမုန်းထားမူတွေဟာ အိန္ဒိယနိုင် ငံမှာ ဗုဒ္ဓ၀ါဒ ကွယ်ပျောက်ခြင်းရဲ့ အဓိကအကြောင်းရင်းတွေ အနက်က တစ်ခု ဖြစ်တယ်လို့ ကောက်ချက်ဆွဲ
တာဖြစ်တယ်။ အဲဒီနောက် ပိုင်း ဗြာဟ္မဏ၀ါဒဟာ ဥဒ္ဓယောတကရ၊ ကုမာရိဠ၊ သင်္ကရ၊ ဥဒယန၊ ၀ါစသပတိ မိသရ တို့ရဲ့ ပံ့ပိုးထောက်ပံ့မူ၊ ချီးမြှောက်အားပေးမူ နဲ့ အိန္ဒိယနိုင်ငံရဲ့ ဒေသများစွာမှာ ထွန်းကားပြန့်ပွားခဲ့ပါတယ်။

အိန္ဒိယနိုင်ငံ ဗုဒ္ဓ၀ါဒ ကွယ်ပျောက်ခြင်း ...
=============================
အုပ်ချုပ်သူ ဘုရင်တွေရဲ့ နှိပ်စက်ပိတ်ပင်ခြင်း ကလည်း အိန္ဒိယနိုင်ငံမှာ ဗုဒ္ဓ၀ါဒပျောက်ကွယ်သွားခဲ့ခြင်းရဲ့ အကြောင်းရင်းတစ်ခု ဖြစ်ခဲ့တယ်။ သမိုင်းဆရာ အချို့ကတော့ အထူးသဖြင့် ဗြာဟ္မဏ၀ါဒီ ဘုရင်တွေရဲ့ ဗုဒ္ဓဘာသာဝင်တွေ အပေါ်နှိပ်စက် ပိတ်ပင်ခြင်း ဟာ အိန္ဒိယ မှာ ဗုဒ္ဓ၀ါဒ ကျဆုံးစေခဲ့တဲ့ အဓိကကျဆုံး အကြောင်းရင်းတစ်ခု ဖြစ်ခဲ့တယ် လို့ ဆိုပါတယ်။
ဗြာဟ္မဏဘုရင် ပုသျှမိတြ သုင်္ဂ (ဘီစီ ၁၈၇ - ၁၅၁) ဟာ ဗုဒ္ဓဘာသာဝင်တွေကို ရက်ရက်စက်စက် နှိပ်ကွပ်ခဲ့တယ် လို့ ဆိုပါ တယ်။ တိဘက် သမိုင်းဆရာ တရာနာထ ကတော့ သူဟာ ဗုဒ္ဓ၀ါဒကို နှိပ်ကွပ်ခဲ့သူ ရက်စက်တဲ့ ဗြာဟ္မဏ ဘုရင်တစ်ပါးဖြစ်တယ် လို့ ရေးသားခဲ့တယ်။ တရုတ်နဲ့ ဂျပန် သမိုင်းအချို့မှာ လည်း ပုသျှမိတြ အမည်ဟာ ဗုဒ္ဓ၀ါဒကို နှိပ်ကွပ်ခဲ့တဲ့ ဘုရင်တွေရဲ့ အမည်
စာရင်းမှာ ထိပ်ဆုံးက ပါဝင်နေကြောင်းတွေ့ရတယ်။ ပုရာဏ်ကျမ်းမှာ စစ်သေနာပတိ စစ်သူကြီး ပုသျှမိတြဟာ မောရိယ အင် ပါယာ ရဲ့ နောက်ဆုံးဘုရင် ဗြဟဒြထ ကို လုပ်ကြံသတ်ဖြတ်ပြီး မာဂဓ ထီးနန်းကို သိမ်းပိုက်ခဲ့တယ်။ ပြီးတော့ သုင်္ဂမင်းဆက်ကို စတင် တည်ထောင်ခဲ့ပြီး အဲဒီ မင်းဆက်ဟာ နှစ်ပေါင်း (၁၁၂) ကြာ (ဘီစီ ၁၈၇ - ၇၅) ထီးနန်း စိုးစံခဲ့တယ် လို့ ဆိုပါတယ်။ ဗြဟဒြ ထ လုပ်ကြံခံခဲ့ရခြင်းဟာ နှစ်ပေါင်း (၁၃ရ) နှစ်ကြာစိုးစံခဲ့တဲ့ မောရိယာ အင်ပါယာကို အဆုံးသတ်သွားစေခဲ့တယ်။ ပုသျှမိတြ ရဲ့ မျိုးရိုး အဆက် အနွယ်နဲ့ ပတ်သက်ပြီး ပညာရှင်တွေ အယူဆ အမျိုးမျိုးကွဲကြပေမဲ့ သူဟာ သုင်္ဂ မင်းဆက်ကို စတင်တည်ထောင်ခဲ့သူ ပထမဆုံး ဘုရင် ဖြစ်တယ် ဆိုတာကိုတော့ အားလုံး လက်ခံထားကြတယ်။ ဒိဗျာဝဒါနကျမ်း နဲ့ တာရာနာထ ရဲ့ ရေးသားမူအရ ပုသျှ မိတြ ဘုရင်ဟာ ဗုဒ္ဓ၀ါဒကို အပြင်းအထန် ရန်လိုမုန်းတီးသူ ဖြစ်ကြောင်းသိကြရတယ်။ သူဟာ စေတီတွေကို ဖြိုဖျက်ခဲ့တယ်။ မဇ္ဈိမ ဒေသ ကနေ ပန်ဂျပ်ပြည်နယ်က ဇာလန္ဓရာ ထိ ဒေသတစ်လျှောက်လုံးက ဘုန်းကြီးကျောင်းပေါင်းများ စွာကို မီးတိုက် ခဲ့ပြီး ကျမ်းတတ် ရဟန်းတွေကိုလည်း သတ်ဖြတ်ခဲ့တယ် လို့ ဒိဗျာဝဒါန မှာ ရေးသားထားတယ်။ သူဟာ ပါဋလိပုတ် က နာမည်ကျော် ကုက္ကုဋာရာမ ကျောင်းတိုက်ကြီးကိုတောင် ဖျက်စီးဖို့ ကြိုးစားခဲ့တယ် လို့ ဆိုပါတယ်။ သို့ပေမဲ့ ကျောင်းတိုက်ကြီးကို အန္တာရာယ် မပြုနိုင်ခဲ့ကြောင်း သိရတယ်။ ပညာရှင်အချို့ကတော့ ပုသျှမိတြဘုရင်ဟာ တစ်ဖက်က ဗုဒ္ဓဘာသာ ဘုန်းကြီးကျောင်းတွေကို ဖျက်စီးခြင်းနဲ့ အခြားတစ်ဖက်က သူနဲ့ ခေတ်ပြိုင် ဗြာဟ္မ ဏ ဘာသာရေးခေါင်းဆောင်တွေရဲ့ အကူအညီနဲ့ ဗြာဟ္မဏ၀ါဒ ယဇ်ပူဇော်ခြင်း ဓလေ့ အခမ်းအနားတွေကို ပြန်လည်ထွန်းစေခြင်းဖြင့် သူ့ဟာ ဗြာဟ္မဏ ၀ါဒ ပြန်လည်ထွန်းကားရေးအတွက် ဦးဆောင် ဘုရင်ဖြစ်ကြောင်း ပြသခဲ့တယ် လို့ဆိုပါတယ်။ ၀ါဒြဘ နဲ့ ယ၀နတိုင်း စစ်ပွဲတွေ အပြီးမှာ မြင်းနှစ်ကောင် ယဇ် ပူဇော် ပွဲ ပြုလုပ်ခဲ့ခြင်းဟာ ပုသျှမိတြရဲ့ ဗြာဟ္မ၀ါဒအပေါ် နက်နက်ရှိုင်းရှိုင်း သက်ဝင်ခြင်းကို ဖော်ပြနေပါတယ်။

ရွှင်ကျန်ဟာ ၀ိကြမဒိတျာ လို့ ထင်ရှားတဲ့ ဘုရင်တစ်ပါးနဲ့ ပတ်သက်ပြီး သူ့မှတ်တမ်းမှာ ရေးသားထားခဲ့တယ်။ အဲဒီ ဘုရင်ဟာ ၀ါသုဗန္ဓုရဲ့ ဆရာ
ဗုဒ္ဓ ဒ ဿ န ပညာရှင် မနောရထ မထေရ် ကို ဖိအားပေး နှောက်ယှက်ခဲ့တယ် လို့ ဆိုပါတယ်။ အဲဒီ ဘုရင် ဟာ မနောရထ မထေရ်နဲ့ တိတ္ထိဆရာ အယောက် (၁၀၀) တို့ကို အယူဝါဒရေးရာ စကားစစ်ထိုးဖို့ အစည်းဝေးကြီးတစ်ခု ကျင်းပ ပေးခဲ့ပြီး အကယ်၍ မနောရထ ဟာ ဒီစကားစစ်ထိုးပွဲမှာ ရှုံးနိမ့်ခဲ့ရင် ဗုဒ္ဓဘာသာဝင်တွေဟာ သေဒဏ်ခံရမယ် လို့ အမိန့် ထုတ်ပြန် ခဲ့ကြောင်း ရေးသားထားတယ်။ မနောရထ မထေရ် ဟာ ပြိုင်ဘက် တိတ္ထိခေါင်းဆောင် (၉၉) ယောက်ကို အနိုင်ယူခဲ့ တယ်။

ဒါပေမဲ့ နောက်ဆုံး တတ္ထိ ခေါင်းဆောင်နဲ့ ဆက်လက်ပြီး အယူဝါဒရေးရာ ပြိုင်ဆိုင်ဆွေးနွေးတဲ့အခါ ဘုရင်နဲ့ ဗုဒ္ဓဘာသာ ၀င် မဟုတ်သူ ပြည်သူတွေဟာ အော်ဟစ် ကန့်ကွက်ကြတယ် လို့ ဆိုပါတယ်။ ဒီ ဖြစ်ရပ်ကြောင့် မနောရထ မထေရ် ဟာ စိတ် မကောင်းဖြစ်ခဲ့ပြီး ‘‘ပရိသတ် ဟာ တရားမျှတမူ မရှိဘူး’’ လို့ သူ့တပည့် ၀ါသုဗန္ဓုထံ စာရေးသား ပြောဆိုခဲ့ကြောင်း ဖော်ပြ ထားတယ်။ ဒီ ဘုရင်ဟာ နောက်ပိုင်းမှာ စစ်ရှုံးခဲ့ပြီး ပညာရှိတွေကို ပူဇော် အသိမှတ်ပြုတဲ့ ဘုရင်တစ်ပါးက ဆက်ခံ အုပ်စိုးခဲ့တယ် လို့ ဆိုပါတယ်။ အဲဒီ ဘုရင် လက်ထက်မှာ ၀ါသုဗန္ဓု ဟာ တိတ္ထိဆရာတွေ အားလုံးကို အယူဝါဒ ရေးရာ စကားပြိုင်ဆိုင်ပြီး အနိုင် ယူခဲ့ကြောင်း ဆက်လက်ရေးသားထားတယ်။ ပညာရှင်တွေကတော့ ၀ိကြမာဒိတျာ မင်းဟာ ကြမာဒိတျာဘွဲ့ နဲ့ ၀ိကြမာဒိတျာ ဘွဲ့အမည်တွေနဲ့ ထင်ရှားတဲ့ သ္က န္တဂုပတ ဘုရင်ဖြစ်တယ် လို့ ဆိုပါတယ်။

ဗုဒ္ဓ၀ါဒကို ရန်လိုနှိပ်ကွပ်ခဲ့တဲ့ နောက် ဘုရင်တစ်ပါးကတော့ အာဏာရှင် တုရုရှကလို့ အမည်တွင်တဲ့ မိဟိရကုလ (မိဟိရဂုလ)ဘုရင်ဖြစ်တယ်။
သမိုင်းဆရာ တာရာနာထနဲ့ ဘူစတန်တို့ရဲ့ ရေးသားမူအရ သူဟာ ကသ္မီိရ တိုင်းကို သိမ်းပိုက်အုပ်စိုးခဲ့တဲ့ တုရုရှက ဘုရင်ဖြစ် တယ်။ ကသ္မီရတိုင်းရဲ့ နာမည်ကျော်သမိုင်းဆရာ နဲ့ ရာဇတရ င်္ဂိဏီ ကျမ်းဆရာဖြစ်တဲ့ ကာဠှဟန က ဒီဘုရင်ဟာ ဗုဒ္ဓ၀ါဒကို ရန်လို နှိပ်ကွပ်ခဲ့တဲ့ ဘုရင်တစ်ပါးဖြစ်ပြီး သူ့ရဲ့ ရက်စက်မူတွေကြောင့် သူဟာ ယမမင်းနဲ့ ဥပမာပေးရမှာ ဖြစ်တယ် လို့ ဆိုပါ တယ်။ ပြီးတော့ သူ့ရဲ့ရက်စက်မူတွေနဲ့ မကောင်းမူတွေကို အသေးစိတ် မှတ်တမ်းတင်ရရင် မှတ်တမ်းတင်သူပါ မကောင်းမူတွေ နဲ့ ငြိစွန်းသွားနိုင်တယ် လို့တောင် ရေးသားခဲ့တယ်။ မဟိရကုလ ဘုရင်ဟာ ဟိန္ဒူဝါဒ ထွန်းကားပြန့်ပွားဖို့ အတွက် အရေးပါတဲ့ ဆောက်ရွက်မူတွေ လုပ်ဆောင်ခဲ့ကြောင်းလည်း အဲဒီ မှတ်တမ်းကတစ်ဆင့် သိကြရတယ်။ သူဟာ ရှီဝ နတ်ဘုရားကို ကိုး ကွယ်သူဖြစ်ပြီး ရှရီနဂရ မှာ ရှီဝနတ်ဘုရားကျောင်း တစ်ကျောင်း ဆောက်လုပ်ကိုးကွယ်ခဲ့တယ်။

သူဟာ ဗုဒ္ဓ၀ါဒီတွေကို နှိပ် ကွပ်ခဲ့ပြီး ရက်ရက်စက်စက် ဆက်ဆံပြုမူခဲ့တယ်။ သူ့ရဲ့ ဦးဆောင်လှုံဆော်မူကြောင့် ပန်ဂျပ်ပြည်နယ်နဲ့ ကသ္မီရ မှာ ရှိခဲ့တဲ့ ဗုဒ္ဓ ဘာသာဝင်များစွာ သတ်ဖြတ်ခံခဲ့ရရုံမျှ မကဘူး၊ ဂူကျောင်းဘုရားစေတီများစွာနဲ့ ဗုဒ္ဓသာသနိက အဆောက်အဦးများစွာလည်း ဖျက်စီးခံခဲ့ရတယ်။ သူဟာ ဗုဒ္ဓဘာသာဝင်တွေကို အကျင့်ပျက်ပြီး အာဏာဖီဆန်သူတွေလို့ ယူဆခဲ့တယ်။ ဗုဒ္ဓဘာသာ ဂူကျောင်း ဘုရား၊ စေတီပေါင်း (၁၆၀၀) ကို ဖျက်စီးခဲ့တယ် လို့ ဆိုပါတယ်။ ပြီးတော့ ဗုဒ္ဓဘာသာဝင် အရေအတွက်ပေါင်း ကောဋိ ကိုးရာ ကိုလည်း သတ်ခဲ့တယ် လို့ ဆိုထားတယ်။ သမိုင်းဆရာ အာ.စီ မိတြ ကတော့ ကသ္မီရတိုင်းမှာ ဗုဒ္ဓ၀ါဒ ဟာ မိဟိရ ကုလ ဘုရင် လက်ထက်လောက်က စနစ်တကျနှိပ်ကွပ်ဖျက်စီးခံခဲ့ရတာ နဲ့ ဟရရှ မင်းဆက်နဲ့ ကလသ မင်းဆက်တွေ အတွင်း မကြာခဏ နှိပ်ကွပ်ခံခဲ့ရတာတွေ ပေါင်းမိပြီး အထူး ကံဆိုးခဲ့တယ် လို့ ပြောရမှာဖြစ်ကြောင်း ရေးသားထားတယ်။

ကြာ ပွင့်မျက်နှာတော် သုတ္တံမှာတော့ မိဟိရကုလ ဘုရင်ရဲ့ ဗုဒ္ဓ၀ါဒ အပေါ် ဖိနှိပ်ရန်လိုမူ ကို ဖော်ပြထားတယ်။ သူဟာ ကိပန် မှာရှိတဲ့ ဗုဒ္ဓ၀ါဒီတွေကို သတ်စေခဲ့သလို သူ့ရဲ့ လှုံဆော်မူကြောင့် ဗုဒ္ဓမြတ်စွာရဲ့ သပိတ်တော်လည်း ကွဲခဲ့ရတယ် လို့ ဆိုပါတယ်။ တရုတ် မှတ်တမ်းကျမ်းတစ်ကျမ်းမှာတော့ သူဟာ ကိပန် က ဗုဒ္ဓဘာသာ ဘုန်းကြီးကျောင်းများစွာကို ဖြိုဖျက်စေခဲ့ပြီး သံဃာတွေကို သတ်စေခဲ့တယ်။ ၂၃ ပါးမြောက် နာယက မထေရ်မြတ်ဖြစ်တဲ့ သိံဟ မထေရ် ဟာ ဒီ ဘုရင်ရဲ့ အမိန်နဲ့ သေဒဏ်ကျခံခဲ့ရတယ် လို့ ဆိုပါတယ်။
ကောသမ္ဗီက ဃောသိတာရာမ ကျောင်းတော် အကြွင်းကျန် အပျက်စီးတွေထဲကနေ နောက်ထပ် ဟန်း လူမျိုး ဘုရင်တစ်ပါး ဖြစ်တဲ့ တောရမာဏရဲ့ အမိန့် တံဆိပ်တုံးတစ်ခုကို ရှာဖွေတွေ့ရှိခဲ့တယ်။ ဒီ အချက်က တောရမာဏ ဦးဆောင်ခဲ့တဲ့ ဟန်းလူမျိုး တွေဟာ ဒီ ကျောင်းတော်ကြီးကို ဖျက်စီးခဲ့တယ် လို့ ညွှန်းဆိုနေတယ်။ ဂျိုးဇက် အက်ဒင် ရဲ့ မှတ်တမ်း အရ (၆) ရာစုနှစ် အစ မှာ တရုတ်ပြည်ထဲကို ၀င်ရောက်လာတဲ့ အိန္ဒိယနိုင်ငံသား အရေတွက်ဟာ (၃၀၀၀) လောက်ရှိမယ် လို့ ဆိုပါတယ်။ သူတို့ဟာ ဗြာဟ္မဏ ဘုရင်ရဲ့ နှိပ်စက်မူ ဒဏ်ကို မခံနိုင်လို့ ထွက်ပြေးလာခဲ့တဲ့ဗုဒ္ဓ၀ါဒီတွေဖြစ်ကြောင်း ရေးထားတယ်။ အဲဒီ ဗြာဟ္မဏဘုရင်
ဆိုတာ ဟန်းလူမျိုး ဘုရင်တွေ ဖြစ်နိုင်စရာ အများကြီးရှိတယ်။

နောက်ထပ် ဗုဒ္ဓ၀ါဒကို ရန်လို နှိပ်ကွပ်ခဲ့တဲ့ ဘုရင်ကတော့ ဂေါဒပြည် ဘုရင် သသင်္က ဖြစ်တယ်။ ဂျို ရှီ ရဲ့ မှတ်ချက်အရ ရှေး ခေတ် အိန္ဒိယသမိုင်းက ဗုဒ္ဓ၀ါဒကို ဆန့်ကျင်ခဲ့တဲ့ ဗြာဟ္မဏ ဘုရင်တွေထဲမှာ ပုသျှမိတြ သုင်္ဂ မင်း ပြီးရင် သသင်္က မင်းဟာ အထင်ရှားဆုံး ဥပမာပြုစရာ မင်းဖြစ်တယ် လို့ ဆိုပါတယ်။ ဒီ ဘုရင် ဟာ ပါဋိလိပုတ်မှာ ဗုဒ္ဓဘာသာဝင်တွေ အမြတ်တနိုးပူ ဇော်ခဲ့တဲ့ ဗုဒ္ဓခြေရာတော် တွေပါတဲ့ ကျောက်တုံးတော်ကို ဂင်္ဂါမြစ်ထဲ ပစ်ချစေခဲ့တယ်။ သူဟာ ဗုဒ္ဓဂါယာမှာ ရှိတဲ့ မဟာဗောဓိ ညောင်ပင်ကြီးကို အမြစ်ကနေ တူးဖြိုစေခဲ့ ရုံမျှ မက ကြွင်းကျန်နေတဲ့ အပင်နေရာကိုလည်း မီးတိုက်စေခဲ့တယ် လို့ ဆိုပါတယ်။ မဟာဗောဓိပင်ရဲ့ အရှေ့ဘက်မှာ ထားရှိပူဇော်ထားတဲ့ ဗုဒ္ဓဆင်းတုတော်ကို ဖယ်ရှားစေခဲ့ပြီး ရှီဝ နတ်ဘုရား ရုပ်တုကို ထားရှိ ပူဇော်ခဲ့တယ်။ မဉ္ဇူ သီရိ မူလက္လပ ကျမ်းမှာ ရေးသားမှတ်တမ်းတင်ထားတဲ့ သသင်္ကမင်းရဲ့ ဗုဒ္ဓ၀ါဒ အပေါ်ရန်လို နှိပ်ကွပ်မူ တွေ ဟာ ရွှင်ကျန်ရဲ့ မှတ်တမ်း ထဲက အတိုင်းပါဘဲ။
ရွှင်ကျန်ရဲ့ ဘ၀ခရီး မှတ်တမ်းထဲမှာ ဟရရှ ဘုရင်လက်ထက်အတွင်း ကနောဂ်ျက ဗြာဟ္မဏတွေရဲ့ ဗုဒ္ဓ၀ါဒအပေါ် ရန်လိုမူကို လည်း တွေ့ရတယ်။ ကနောဂ်ျ က ပညာတတ် ဗြာဟ္မဏတွေဟာ ဟရရှဘုရင်က ဗုဒ္ဓဘာသာကို အထူးထောက်ပံ့ ချီးမြှောက်ခဲ့မူ အပေါ် မနာလို ဖြစ်ပြီး တရုတ် ဗုဒ္ဓဘာသာ ဘုရားဖူးတွေ နားခိုဖို့ တည်ဆောက်ထားတဲ့ တည်းခိုဇရပ်ကို ဖျက်စီးပစ်ခဲ့ပြီး ဘုရင် ကြီး ရဲ့အသက်ကို တောင် လုပ်ကြံဖို့ကြိုးစားခဲ့တယ် လို့ ဆိုထားပါတယ်။

အိန္ဒိယနိုင်ငံ ဗုဒ္ဓ၀ါဒ ကွယ်ပျောက်ခြင်း ...
==============================

အေဒီ (၇) ရာစု ပါရှား ကျဆုံးသွားတဲ့အခါ အာရပ် အောင်နိုင်သူတွေဟာ ပါရှန် အင်ပါယာရဲ့ မြောက်ဘက်ပိုင်းမှာ လှည့်လည် နေထိုင်ကြတဲ့ တူရကီ လူမျိုးစုတွေနဲ့ ပေါင်းစည်းသွားခဲ့ကြတယ်။ သူတို့ဟာ ဘုံရန်သူကို တိုက်ခိုက်ရာမှာ အထူးသဖြင့်အောင် နိုင်ခဲ့တဲ့ အာရပ်တွေရဲ့ အယူဝါဒကို လွယ်လင့်တကူ လက်ခံခဲ့ကြပါတယ်။ အဲဒီ အချိန်က အယူဝါဒ များစွာထွန်းကားနေပေမဲ့ ဗုဒ္ဓ၀ါဒီ အများစု နေထိုင်တဲ့ အာရှအလယ်ပိုင်း ကိုလည်း အာရပ်တွေ အောင်နိုင်ခဲ့ပြီး အစ်စလာမ်ဘာသာ သွတ်သွင်းခဲ့တယ်။ အီရန် နိုင်ငံအတွင်းမှာတော့ အဲဒီ ခေတ်ကာလ က အနောက်ဘက် အကျဆုံး တိုင်းပြည်ဖြစ်တဲ့ အိန္ဒိယ ဂျ ဂုဍ မင်းဆက် အုပ်စိုးရာ ဒေသ ထိရောက်လာခဲ့ပြီး အေဒီ ၆၅၀ မှာ တန်ပြန် ခုခံမူနဲ့ ကြုံခဲ့ရတယ်။ (အဲဒီ မင်းဆက်ဟာ ယာဒ၀ မင်းဆက် က ဂဂျနီ ကို ဗဟိုပြုပြီး တည်ထောင်ခဲ့တဲ့ ဒီနေ့ခေတ် ကန်ဒဟာ ဒေသဖြစ်တယ်)။ အေဒီ (၈) ရာစု အစောပိုင်းမှာ အာရပ်တွေ ဟာ သိန္ဓုနိုင်ငံကို ကုန်းကနေရော၊ ပင်လယ်ကနေပါ တိုက်ခိုက်ခဲ့ပြီး တဖြည်းဖြည်း သိမ်းပိုက်နိုင်ခဲ့တယ်။ အေဒီ (၈) ရာစု နှောင်းပိုင်းရောက်တဲ့အခါ သိန္ဓု ဒေသ ကို ခြေကုပ်ယူပြီး တက္ကသိုလ်နဲ့ တကွ ၀လဘိ ဒေသ ကို ဖျက်စီးနိုင်ခဲ့တယ်။ သို့သော်လည်း အိန္ဒိယ ‘‘ရာဇပုတ်’’ မင်းတွေ အထူးသဖြင့် ပရတိဟာရ က မင်းတွေရဲ့ တန်ပြန်ခုခံမူကြောင့် အာရပ်တွေဟာ သိန္ဓု ဒေသ ကို တဖန် ဆုတ်ခွာခဲ့ရပြန်တယ်။ အဲဒီ ခေတ်ကာလမှာ အနောက်ဘက် တိုင်းနိုင်ငံက ဗုဒ္ဓဘာသာ ရဟန်းတော်များစွာဟာ ပါလ အင်ပါယာ ကို စစ်ဘေးရှောင် ထွက်ပြေးခဲ့ကြရတယ်။ တူရကီ တွေဟာ အာရှမှာ အင်အားအကောင်းဆုံး အစ်လာမ်ဘုရင် တွေဖြစ်လာခဲ့ပါတယ်။ သူတို့ဟာ အိန္ဒိယနိုင်ငံရဲ့ရတနာမြေ၀င်ပေါက်ကို ပိတ်ဆို့နေတဲ့ ဂျဂုဋ မင်းဆက် ကို အကြိမ်ကြိမ်တိုက်ခိုက် ခဲ့ပြီး အေဒီ (၉) ရာစု အကုန်လောက်မှာ အပြီးတိုင် သိမ်းပိုက်နိုင်ခဲ့တယ်။ ယာဒ၀ အဆက်နွယ်တွေကတော့ ရာဂျသန်ကိုဆုတ် ခွာခဲ့ပြီး ဂျိုင်ဆလမီယား မှာ အခြေပြုနေခဲ့တယ်။ ရှေးဟောင်း ယာဒ၀မင်းဆက်ရဲ့ မြို့တော် ဂဂျနီဟာ ဂန္ဓာရတိုင်းကိုတိုက်ဖို့ အတွက် တူရကီတွေရဲ့ ခြေကုပ်နေရာဖြစ်ခဲ့တယ်။ ကာပိရှနဲ့ ကုဘ (ကာဗူးလ်) အပါအ၀င် ဂန္ဓာရတိုင်းဟာ အရင်က ကူရှန် မင်းဆက်ရဲ့ အဆက်အနွယ်ဖြစ်ပုံရတဲ့ ဆာဟိ သို့မဟုတ် ခတ္တိယမင်းဆက်တွေ အုပ်စိုးခဲ့တာဖြစ်တယ်။ သို့သော်လည်း အေဒီ (၉) ရာစု အလယ်ပိုင်းရောက်တဲ့အခါ ဗြာဟ္မဏမင်းဆက် ဖြစ်တဲ့ ဆာဟိ မင်းဆက်က လုပ်ကြံသိမ်းပိုက်ပြီး ကျယ်ပြန့်တဲ့ အင်ပါယာ တစ်ခုထူထောင်ခဲ့နိုင်ခဲ့လို့ တူရကီတပ်တွေကို နောက်ထပ် တစ်ရာစုလောက် တန်ပြန်ခုခံထားနိုင်ခဲ့တယ်။ အဲဒီ နောက် ဂဂျနီ (ဂန်ဇနီ) မှာ တူရကီမင်းဆက်တစ်ဆက် (ယမီနီမင်းဆက်) တက်လာပြီး ဂန္ဓာရတိုင်းကို အပြင်းထန်ဆုံး စစ်ဆင် ခဲ့တယ်။ အဲဒီ စစ်ပွဲဟာ အိန္ဒိယနိုင်ငံအတွက် ရှည်ကြာလွန်းတဲ့ စစ်ပွဲတစ်ပွဲဖြစ်ခဲ့ပြီး မကြုံဘူးလောက်အောင် ရက်စက်ပြင်းထန် ခဲ့တယ်။ ခေတ်ပြိုင်သမိုင်း မှတ်တမ်းဆရာတွေက ‘‘တူရကီစစ်ပွဲတွေ’’ ဟာ အိန္ဒိယမှာ ဘုရင်အချင်းချင်း အင်အားပြိုင်ဆိုင်တိုက် ခိုက်တဲ့ စစ်ပွဲတွေနဲ့ အများကြီးကွာခြားပြီး စစ်ပွဲ ပုံစံသစ်ဖြစ်တယ်လို့ မှတ်တမ်းတင်ခဲ့ကြရတယ်။ အိန္ဒိယနိုင်ငံဟာ ယဉ်ကျေးမူကြီး တစ်ခုလုံး လုံးဝ ပြိုလဲမသွားအောင် ခုခံတိုက်ခိုက်ခဲ့ရတယ်။ အေဒီ (၁၀) ရာစုအကုန်နဲ့ (၁၁) ရာစုအစ အတွင်း မှာ တိုက် ပွဲ အကြိမ်ကြိမ် ဆင်နွှဲပြီး ဆာဟိစ် တပ်တွေဟာ ကာပိရှနဲ့ ဂန္ဓာရတောင်ကြားရောက်အောင် တိုက်ထုတ်ခံခဲ့ရတယ်။
အေဒီ ၁၀၂၀ ကို ရောက်တဲ့အခါ ဆာဟိစ်မင်းဆက် ဟာ နယ်မြေအားလုံး ဆုံးရူံးခဲ့ရပြီး သူတို့ရဲ့ လက်ကျန်တပ်တွေကတော့ကက် ရ်ှမီးယား သို့မဟုတ် မာလ၀ ဒေသက ပရမာရ ရာဇပုတ် တိုင်းပြည်မှာ ခိုလှုံခဲ့ရတယ်။ အဲဒီနောက် တူရကီ ခေါင်းဆောင် ဆူလ်တန် မိုဟာ မဒ် ဟာ ပရတိဟာရ ပြည်ကို တိုက်ခိုက်ခဲ့ပြန်တယ်။ သူ့ အတွက် ကံကောင်းတာက အဲဒီ အချိန်က ပရတိဟာရ မှာ အင်ပါယာ ပြိုကွဲနေပြီး မြေရှင်တွေ တကွဲတပြား ကြီးစိုးနေတာဖြစ်တယ်။ အဲဒီ နောက် ဆက်ပြီး ကျယ်ပြန့် တဲ့ ဒေသတစ်လျှောက် ဆက်လက် တိုက်ခိုက်သိမ်းပိုက်ခဲ့ပြန်တယ်။ သိမ်းပိုက်ရာဒေသ တစ်လျှောက်မှာ လုယက်ဖျက်ဆီးမူတွေအကြီးကျယ်လုပ်ခဲ့ သလို၊ ကျေးကျွန်ပေါင်းများစွာကိုလည်း ဖမ်းဆီးခေါ်ဆောင်ခဲ့တယ်။ ရတနာ ပစ္စည်းပေါင်းများစွာစုနေတဲ့ ဘုရားကျောင်းပေါင်း ထောင်ချီကိုလည်း ဖြိုချဖျက်စီးခဲ့တယ်။ မထုရာ မြို့လည်း လုယက်ဖျက်ဆီး ခံခဲ့ရတယ်။ ပရတိဟာရ တပ်မကြီးတစ်ခုလုံးကျ သွားတဲ့အခါ မြို့တော် ကာညကုဗ်ဂ်ျ လည်းဘဲ ဖျက်ဆီးခံခဲ့ရပါတယ်။ ဘုရားကျောင်းပေါင်း (၁၀၀၀၀) လောက်ဟာ လက်မူပစ္စည်းတွေနဲ့ အတူ ဖျက်ဆီးခံခဲ့ရပြီး အဲဒီကျောင်းတိုက်တွေမှာ မပြေးဘဲ ကျန်ရစ်သူတွေ သတ်ဖြတ်ခံခဲ့ရတယ် လို့ ဆိုပါတယ်။ နောက်ဆုံး စန္ဒြာတရိယ ဘုရင် ၀ိဓျဓရ ဟာ တူရကီတပ်တွေကို တားဆီးနိုင်ခဲ့တယ်။ သို့သော်လည်း မိုဟာမက်ဒ်ရဲ့ တပ်တွေဟာ ပန်ဂျပ်ပြည်နယ် အပါဝင် သိန္ဓုနယ်တစ်ခုလုံးကို သိမ်းပိုက်နိုင်ခဲ့ပြီး သူ့ရဲ့ အင်ပါယာအတွင်း သွတ်သွင်းနိုင်ခဲ့လို့ အိန္ဒိယမှာ ကျယ်ပြန့်တဲ့ တူရကီအင်ပါယာတစ်ခု တည်ထောင်နိုင်ခဲ့တယ်။ ဒီလို တူရကီတပ်တွေနဲ့ အိန္ဒိယက ဒေသခံ တိုင်းပြည် ငယ် အသီးသီးက တပ်တွေရဲ့ ဆက်တိုက် စစ်ပွဲတွေပြီးတဲ့အခါ နောက်ထပ် နှစ်ပေါင်း (၁၅၀) လောက်ကြာတဲ့အထိ ထူးခြားတဲ့ ပြောင်းလဲမူတွေ ကို မတွေ့ခဲ့ကြရဘူး။
အဲဒီ ခေတ်တစ်လျှောက် ထူးခြားချက်တစ်ခုကဘာလဲဆိုတော့ အိန္ဒိယနိုင်ငံအတွင်းမှာ တိုင်းပြည်ငယ်များစွာ တကွဲတပြားရှိနေခဲ့ တာဖြစ်ပြီး ဘယ်တိုင်းပြည်ကမှ အင်ပါယာတစ်ခုဖြစ်အောင် မစုစည်းနိုင်ခဲ့တဲ့အချက်ဖြစ်တယ်။
အေဒီ ၁၁၇၃ မှာ အာရှအလယ်ပိုင်းက တူရကီဘုရင် မိုဟာမဒ်ဟာ ယာမီနီမင်းဆက်ကို ဖြုတ်ချခဲ့တယ်။ အေဒီ ၁၁၇၈ မှာသူဟာ ဂူဂျာရတ်ပြည်ကို တိုက်ခိုက်ခဲ့ပေမဲ့ မအောင်မြင်ဘဲ တပ်များစွာ ဆုံးရှုံးခဲ့ရတယ်။ အဲဒီ ခေတ်မှာ တကွဲတပြားဖြစ်နေတဲ့ အိန္ဒိယ က တိုင်းပြည်ငယ်တွေဟာ ခုပြောခဲ့သလိုတိုင်းပြည်ငယ် တစ်ခုက တူရကီတပ်တွေကို တိုက်ခိုက်အောင်နိုင်ခဲ့တယ်ဆိုရင် သူတို့အတွက် အဲဒီ တူရကီတပ်တွေဟာ ခြိမ်းချောက်နိုင်ခဲ့ပုံမရဘူး။ အင်အားကြီးထွားလာတဲ့ ရာဇပုတ် ပြည်ငယ်တစ်ခုဖြစ်တဲ့ စာဟမာနပြည် ဟာ ကာညကုဗ်ဂ်ျ ကနေ အင်ပါယာထောင်ဖို့ ကြိုစားလာတဲ့ ဂါဟဍ၀ါလပြည်ကို စစ်ကြေငြာတိုက်ခိုက်ခဲ့တယ်။ တူရကီအင်ပါယာနဲ့ အိမ်နီးချင်းတိုင်းပြည်ငယ်တွေဖြစ်တဲ့ ဂူဂျာရတ်နဲ့ စန္ဒြာတရေယ ပြည်တို့ကိုလည်း စစ်ကြေငြာခဲ့တယ်။ အဲဒီ တိုင်ပြည်ငယ်တွေ ဟာ ၁၁၉၀-၁ မှာ တူရကီအင်ပါယာကို အောင်နိုင်ခဲ့ပြီး ပန်ဂျပ်ပြည်ထိ ထိုးဖောက်နိုင်ခဲ့လို့ အင်ပါယာကြီး တစ်ခုထူထောင်ဖို့ အလားလာရှိခဲ့ပေမဲ့ မိုဟာမဒ်ဟာ ဂဂျနီမှာ စစ်တပ်အသစ်ဖွဲ့စည်းပြီး အေဒီ ၁၁၉၂ မှာ ပြင်းပြင်းထန်ထန် တန်ပြန်တိုက်ခိုက်ခဲ့တယ်။ ယုံကြည်မူလွန်ကဲခဲ့တဲ့ စာဟမာနက တပ်တွေဟာ ပိုပြီး စနစ်ကျတဲ့ မိုဟာမဒ်တပ်တွေရဲ့ ဒဏ်

ယုံကြည်မူလွန်ကဲခဲ့တဲ့ စာဟမာနက တပ်တွေဟာ ပိုပြီး စနစ်ကျတဲ့ မိုဟာမဒ်တပ်တွေရဲ့ ဒဏ်ကို မခံနိုင်ဘဲ သူတို့ရဲ့မြို့တော် အဂျယမေရုထိ ဆုတ်ခွာခဲ့ရတယ်။ ဒီလို ဆုတ်ခွာတဲ့အခါ အိန္ဒိယမြောက်ပိုင်းလွင်ပြင်ရဲ့ အရှေ့ ဘက်ဆုတ်ခွာရာ လမ်းတစ်လျှောက် စစ်မျက်နှာဟာ အခုခံမရှိ ပွင့်ဟသွားခဲ့ရ တယ်။ နောက်နှစ်မှာဘဲ မိုဟာမဒ်ဟာ ဗရာဏသီနဲ့ ကာညကုဗ်ဂ်ျ ပါဝင်နေတဲ့ ဂါဟဋ၀ါလ ကိုတိုက်ဖို့ သူ့ရဲ့တပ်တွေကို စေလွှတ်ခဲ့တယ်။ အဲဒီ တပ်တွေဟာ အောင်ပွဲ ဆင်ခဲ့ပြီး ဗရာဏသီဟာ လုယက်ဖျက်ဆီးခံခဲ့ရသလို ဘုရားကျောင်း ထောင်ချီလည်း ဖြိုဖျက်ခံခဲ့ရတယ်။

ဘုရားကျောင်းတွေ နေရာ မှာ ဗလီပေါင်းများစွာဆောက်လုပ်ခဲ့တယ်။ ဗရာဏသီရဲ့ အလွန်မှာ ယခင်က ပါလ မင်းဆက်အုပ်စိုးခဲ့တဲ့ နယ်မြေရှိနေတယ်။ သို့သော်လည်း ပါလမင်းဆက်ဟာ အေဒီ ၁၁၆၂ မှာ မြေရှင်မင်း ဆက်ဖြစ်တဲ့ သေနမင်းဆက်ရဲ့ ပုန်ကန်မူကြောင့် နိုင်ငံ ငယ်တွေ အဖြစ် အစိတ်စိတ်ကွဲသွားခဲ့ပါတယ်။ သေနမင်းဆက်ကလည်း တောင့်တင်းခိုင်မာတဲ့ နိုင်ငံတစ်ခု အဖြစ်မရပ်တည်နိုင်ခဲ့ဘူး။ (၁၃) ရာစု အတွင်း ဒီနယ်မြေမှာ ဘာတွေဖြစ်ပျက်ခဲ့တယ် ဆိုတာကိုတော့ အသေချာမပြောနိုင်ဘူး။ သို့ပေမဲ့ သမိုင်းဆရာ တာရာနာထ်ရဲ့ ရေးသားမူအရ ဣရှဝရ(ထာဝရဘုရား၊ရှိဝ သို့မဟုတ် ဗိရှနိုး) ကိုးကွယ်တဲ့ မင်းဆက် (သေနမင်းဆက်ဖြစ်နိုင်တယ်) ဟာ တူရကီတပ်တွေကို မဆန့်ကျင်ခဲ့ဘူးလို့ သိရပါတယ်။ တူရကီတွေဟာ သူတို့ရဲ့ မြေရှင်ဘုရင်ခံတွေထားရှိပြီး အိန္ဒိယအရှေ့ပိုင်းမှာ အင်ပါယာ ချဲ့ထွင်ခဲ့တယ်လို့ ဆိုတယ်။

တူရကီ မှတ်တမ်းတွေအရ စစ်ဗိုလ်ချုပ် ဘက်ခ်တိယာခေါင်းဆောင်တဲ့ ပမာဏမများ တဲ့ မြင်းတပ်တစ်တပ်ဟာ ဘီဟာနဲ့ ဘင်္ဂလားပြည်နယ်ကို ထိုးဖောက် တိုက်ခိုက် ခဲ့ကြောင်း ဖော်ပြထားလို့ စောစောကအချက်ကို ထောက်ခံနေပါတယ်။ အဲဒီ တူရကီတပ်တွေဟာ ပါလမင်းဆက်အတွင်းကတည်ထောင်ခဲ့တဲ့ တက္ကသိုလ်ကြီးတွေကို ရုတ်တရက်ဝင်ရောက်ပြီး မီးရိူ့ဖျက်ဆီးခဲ့ကြတယ်။ တက္ကသိုလ်တွင်းနေထိုင်သူတွေကိုလည်း အစုလိုက်အပြုံလိုက် သတ်ဖြတ်ခဲ့ကြတယ်။ ပြီးတော့ ဥဒ္ဒဏ္ဍပုရ မှာ တပ်စွဲပြီး မိုင်အနည်းငယ် အကွာမှာ တည်ရှိတဲ့ နာလန္ဒာတက္ကသိုလ်ကြီးကို အကြိမ်ကြိမ် စီးနင်းဝင်ရောက်ပြီး မီးရှို့သတ်ဖြတ်ခဲ့ကြတယ်။ သို့ပေမဲ့ သူတို့ဟာ ထုထည်ကြီးမားပြီး ခိုင်ခံ့ထူထဲတဲ့ တံတိုင်းတွေနဲ့ ဆောက် လုပ်ထားတဲ့ ကျောင်းတိုက်ကြီးနဲ့ ဘုရားကျောင်းကိုတော့ အကြွင်းမ ကျန်အောင် မဖြိုဖျက်နိုင်ခဲ့ဘူး။ သူတို့ အဓိက ဖျက်ဆီးခဲ့တာ ဟာ ပိဋကတ် တိုက်အဆောက်အဦးတွေဖြစ်ခဲ့ပုံရတယ်။

အခြား အလားတူ တက္ကသိုလ်ကြီးတွေကိုလည်း သွားရောက်ဖျက်စီး စေခဲ့တယ်။ အိန္ဒိယနိုင်ငံရဲ့ ဗုဒ္ဓ၀ါဒဆိုင်ရာသာမက လောကီဆိုင်ရာ ကြီးမားတဲ့ ယဉ်ကျေးမှုအမွေနှစ်တွေဖြစ်တဲ့ တက္ကသိုလ်ကြီးတွေဟာ အဲဒီ ခေတ်ကာလမှာဘဲအပြီးတိုင်ပျက်စီးသွားခဲ့ရပါတယ်။ အေဒီ ၁၂၀၆ မှာ ဘက်ခ်တိယာဟာ ကာမရူပ (အာသံ)၊တိဘက်နဲ့ တိဘက် အလွန်မှာရှိတဲ့ တူရကီပိုင်နယ်ကို တိုက်ခိုက်ဖို့အတွက် အစီစဉ်ချပြီး ကြီးမားတဲ့ စစ်တပ်ကြီးနဲ့ အရှေ့ ဘက်ကို စစ်ချီခဲ့တယ်။ ကာမရူပမှာ သူ့တပ်တွေဟာ အရေးနိမ့်သွားခဲ့ပြီး လုံးဝနီးပါး ချေမှုန်းခံခဲ့ရတယ်။ သူလည်းဘဲ စစ်ပွဲမှာ ကျဆုံးခဲ့တယ်။ တူရကီ စစ်အင်အားအတားအဆီးဟာ အိန္ဒိယနိုင်ငံမြောက်ပိုင်း ဒေသတစ်လျှောက်မှာ ဆက်လက်ရှိနေသေးပါတယ်။ အဲဒီဒေသကို မွတ်စလင်အခြေချနေထိုင်သူများစွာဝင်ရောက်လာခဲ့တယ်။ အထူးသဖြင့် (၁၃) ရာစု အာရှအလယ်ပိုင်း ကို မွန်ဂိုတပ်တွေ ၀င်ရောက်စိုးမိုးတဲ့အခါ အဲဒီ အခြေနေထိုင်သူတွေဟာ အိန္ဒိယတောင်ပိုင်းနဲ့ အရှေ့ပိုင်းကို ရောက်ရှိလာခဲ့ တယ်။ အဲဒီ ဒေသမှာ အခြေပြုပြီး တူရကီတပ်တွေဟာ အိန္ဒိယတစ်နိုင်ငံလုံးကို သိမ်းပိုက်စိုးမိုးဖို့ ကြိုးစားခဲ့တယ်။ (၁၄) ရာစု ရောက်တဲ့အခါ သီဟိုဠ်ကျွန်းနဲ့ မျက်နှာချင်းဆိုင်က အိန္ဒိယတောင်ဘက် အစွန်းဆုံးထိရောက်ရှိလာခဲ့တယ်။ သို့သော်လည်း ၁၃၃၆ မှာ အိန္ဒိယ ဒေသခံတပ်တွေဟာ တူရကီ စစ်အင်အားတွေကို တန်ပြန်ခုခံနိုင်ခဲ့ပြီး အိန္ဒိယနိုင်ငံတောင်ပိုင်းဒေသတစ် ခုလုံး တစ်စုတစ်စည်းတည်းပါဝင်တဲ့ ၀ိဇယနဂရ နိုင်ငံ ထူထောင်နိုင်ခဲ့ပါတယ်။ ဒါကြောင့်မို့ အိန္ဒိယနိုင်ငံတောင်ပိုင်းမှာ စစ်ရေး၊ နိုင်ငံရေးအားဖြင့် တည်ငြိမ်သွားခဲ့တယ်။သို့ပေမဲ့ မြောက်ပိုင်းက တူရကီတွေကိုတော့ မတိုက်ထုတ်နိုင်ခဲ့ပါဘူး။

တာရာနာထ ရဲ့ရေးသားမူအရ ဗုဒ္ဓဘာသာဝင် စစ်ဘေးရှောင် အများစုဟာ ဗမာပြည်ကိုဖြတ်ပြီး အရှေ့တောင်အာရှနဲ့ တိဘက် ကို ထွက်ပြေးတိမ်းရှောင်ခဲ့ကြတယ်။ အချို့ကတော့ အိန္ဒိယနိုင်ငံတောင်ပိုင်းကို တိမ်းရှောင်ခဲ့ပါတယ်။ အိန္ဒိယနိုင်ငံတောင်ပိုင်း က ကလိင်္ဂဟာ (၁၆) ရာစုအထိ လွတ်လပ်တဲ့နိုင်ငံအဖြစ်ရပ်တည်နိုင်ခဲ့တယ်။ ပြီးတော့ ၀ိဇယနဂရနဲ့ အခြားဒေသတွေဖြစ်တယ်။ရဟန်းတော်အချို့ကတော့ တက္ကသိုလ်အပျက်စီးတွေကြားမှာ ဆက်လက်နေထိုင်ခဲ့တယ်။ ဥပမာ ၁၂၃၅ မှာ နာလန္ဒာကို သွား ရောက်ခဲ့တဲ့ တိဘက် ခရီးသည်တစ်ဦးဟာ တက္ကသိုလ်အပျက်စီးတွေကြားမှာ စာသင်သား (၇၀) လောက်ကို သက္ကတသဒ္ဒါသင် ကြားနေတဲ့ ရှေးဘုန်းတော်ကြီးတစ်ပါးကို တွေ့ခဲ့ရတယ်လို့ ဆိုပါတယ်။
အဲဒီ စာသင်သားတွေထဲမှာ ဘုန်းကြီးတစ်ပါး၊ နှစ်ပါးမှာ သာ စာအုပ်ရှိတယ်လို့ ဆိုတယ်။ (တူရကီတပ်တွေ ပိဋကတ်တိုက်ကို ဖျက်ဆီးတုန်းက ရယူလွတ်မြောက်ခဲ့တာဖြစ်မယ်) အဲ ဒီ ခရီးသည်ရောက်ရှိနေတဲ့ အချိန်မှာတောင် ဥဒ္ဒဏ္ဍပုရမှာ ရှိတဲ့ တူရကီတပ်တွေဟာ နာလန္ဒာကို ၀င်ရောက်တိုက်ခိုက်ခဲ့တယ် လို့ဆိုတယ်။ သူတို့ရဲ့ ရည်ရွယ်ချက်ဟာ ဒီ တက္ကသိုလ်ထဲမှာ ခေါင်းမာစွာ ဆက်လက်နေထိုင်နေတဲ့ ရဟန်းတော်တွေကို သတ်ဖြတ်ဖို့လို့ ယူဆရသလို၊ အပျက်ဆီးတွေကြားထဲမှာ အဖိုးတန်ရတနာပစ္စည်းတွေ မြုပ်နှံ့ထားရှိမယ်လို့ ယူဆပြီး ထပ်မံတူး ဖော်ရှာဖွေဖို့လည်း ဖြစ်နိုင်ပါတယ်။

အဲဒီ ရဟန်းတော်တွေကို ဥဒ္ဒဏ္ဍပုရက သတင်းပေးတစ်ဦးက သတိပေးတဲ့အတွက် ဘေးကင်းရာနေရာတစ်ခုမှာ တိမ်းရှောင်ခဲ့ရကြောင်း ဆိုထားတယ်။ အဲဒီနောက် တူရကီ စစ်သား (၃၀၀) လောက်ဟာတက္ကသိုလ် အပျက်စီးတွေကြား မွှေနှောက်တူးဖော်ရှာဖွေပြီး သူတို့ရဲ့ အခြေစိုက်စခန်းကို ပြန်သွားခဲ့ပါတယ်တဲ့။ သူတို့ပြန်သွားတဲ့အခါ ရဟန်းတော်အချို့ဟာ မီးကျွမ်းနေတဲ့ တက္ကသိုလ်ကြီးဆီကို တဖန်ပြန်လာပြီး နေထိုင်ကြကြောင်းဆိုထားတယ်။ ခရီးသည် တိဘက် ရဟန်းတော်ကတော့ တက္ကသိုလ်ကြီးဆီကို ကျမ်းစာကူးယူဖို့ လာရောက်ခဲ့ခြင်းဖြစ်ပြီး သူကူးယူလိုတဲ့ ကျမ်းစာတစ် စောင်မှ မတွေ့ခဲ့ရလို့ တခြားဒေသ ကို ဆက်လက်ထွက်ခွာသွားခဲ့ရကြောင်း မှတ်တမ်းတင်ထားတယ်။

ဆိုခဲ့ပြီးဖြစ်တဲ့ တက္ကသိုလ်အပျက်စီးတွေကြားမှာ စာပေသင်ကြားပို့ချတဲ့ မထေရ်ဟာ ရာဟုလာ သီရိဘဒြာဖြစ်တယ်။ အဲဒီ မထေရ် ရဲ့ နောက်မှာ နောက်ထပ် တပည့် လေးဆက်မကရှိပြီး သူတို့ဟာ
နာလန္ဒာမှာ ဆက်လက်နေထိုင်ခဲ့ကြောင်း သမိုင်းဆရာ တာရာ နာထက ရေးသားထားတယ်။ သို့သော်လည်း ဗုဒ္ဓ၀ါဒ ပိဋကတ် သင်ကြားပို့ချမူလုပ်ငန်းကြီးကိုပြန်လည်အသက်သွင်းဖို့ တော့ မျှော်လင့်ချက် မရှိတော့ပါဘူး။ ဘာကြောင့်တုန်းဆိုတော့ အဲဒီ ခေတ်ကာလမှာ တူရကီတပ်တွေဟာ မာဂဓ ကို အုပ်စိုးနေခဲ့ပြီး ဗုဒ္ဓ၀ါဒရဲ့ ဗဟိဒ္ဓ နှလုံးသည်းပွတ်ဟာ ဖျက်ဆီးခံခဲ့ရလို့ ဖြစ်တယ်။

ဗြာဟ္မဏ၀ါဒဟာ အစပိုင်းကာလမှာ အစ်စလာမ်စစ်ဒဏ်ကြောင့် အကျပ်တည်းတွေကြုံခဲ့ပေမဲ့ နောက်ပိုင်းမှာ အားကောင်း ကောင်းနဲ့ တုန်ပြန်ခုခံနိုင်ခဲ့လို့ အိန္ဒိယပြည် မွတ်စလင်အုပ်ချုပ်သူတွေ လက်အောက်က လွတ်မြောက်တဲ့ကာလထိအောင် ပြန် လည်ရှင်သန်ခဲ့ပေမဲ့ ဘာကြောင့် ဗုဒ္ဓ၀ါဒ ဟာ ဒီဘေးဒဏ်ကို အင်အားနဲ့ မခုခံနိုင်ဘဲ ကျဆုံးခဲ့ရသလဲ ဆိုတဲ့ မေးခွန်းနဲ့ ပတ်သက် ပြီး မှန်းဆကြည့်ကြရပါ တယ်။ ဗုဒ္ဓ၀ါဒဟာ စကားအရှိအတိုင်းပြောရရင် ဘယ်အခြေနေဖြစ်ဖြစ် အတွေးခေါ်ပိုင်းဆိုင်ရာနဲ့ ငြိမ်းချမ်းရေးဝါဒ ဖြစ်တယ်။ အဲလို ကိုးကွယ်မူဝါဒ ဟာ ‘‘မြင့်မြတ်တဲ့ စစ်ပွဲ’’ ကို အခြေပြုပြီး စစ်အောင်နိုင်တဲ့အခါ စိတ်အားထက် သန်တဲ့ နောက်လိုက်တွေဟာ စစ်အတွင်း တိုက်ခိုက်သိမ်းပိုက် လို့ရရှိလာတဲ့ ကြွယ်ဝမူဆုလဒ်တွေကို အပြစ်ရှိတဲ့ အသုံးဆောင်အ ဖြစ်မယူဆဘဲ၊ မြင့်မြတ်တဲ့ ဆုလဒ်အဖြစ်ယူဆတဲ့ ဆန့်ကျင်ဘက် ဘာသာတရားနဲ့ ရင်ဆိုင်ရတဲ့အခါ အာရှအလယ်ပိုင်းနဲ့ အိန္ဒိယပြည် အနောက်မြောက်ပိုင်းက ဗုဒ္ဓ၀ါဒနိုင်ငံတွေဟာ သူတို့ကိုယ် သူတို့ကာကွယ်ဖို့ စိတ်အားထက်သန်တဲ့ စစ်ရေးစိတ်ဓါတ်နဲ့
စစ်သည်တွေ အထင်အရှားမရှိခဲ့ကြောင်း တွေ့ကြရတယ်။

ဒါဟာ အကြမ်းမဖက်မူ အဆုံးမတရားတော်ရဲ့ အကျိုးဆက် အဖြစ် တွေ့ရခြင်းဖြစ်တယ်။ ဒီ မတိုင်ခင် ခေတ်မှာ ဗုဒ္ဓ၀ါဒဟာ အကြမ်းဖက်မူ စစ်လိုလားတဲ့ လူမျိုးစုတွေကြား (အထူးသဖြင့် ကုရှာဏမျိုးနွယ်စုတွေကြား) ပြန့်နှံ့ရောက်ရှိခဲ့ပြီး လက်ခံကိုးကွယ်တဲ့ လူမျိုးစုတွေကို စစ်နဲ့ စစ်ရဲ့ဖျက်ဆီးမူသဘောဟာ အပြစ်ဖြစ်ကြောင်း ထုတ်ဖော်ဟောကြားခြင်းဖြင့် ယဉ်ကျေးစေခဲ့တယ်။ သို့ပေမဲ့ နောက်ထပ် ထပ်မံဝင်ရောက်လာတဲ့ စစ်ဝါဒီ လူမျိုးစုတွေကတော့ တစ်မျိုးတစ်ဘာ သာဖြစ်တယ်။ သူတို့ဟာ သူတို့ အနိုင်ယူတိုက်ခိုက်ခဲ့တဲ့ စစ်ရူံးသူလူမျိုးစုတွေရဲ့ အယူဝါဒကို လက်ခံရယူနိုင်တဲ့အခြေနေမှာမရှိခဲ့ဘူး။ သူတို့မှာ သူတို့ရဲ့ စစ်အောင်နိုင်မူကို ဘာသာရေးအားဖြင့် မှန်ကန် သင့်မြတ်ကြောင်း နဲ့ စစ်ကို ထပ်မံလှုံဆော်မူပေးတဲ့ ကိုယ်ပိုင်ကိုးကွယ်မူ ဘာသာတရား ရှိနေပြီးဖြစ်တယ်။

ကူရှန်မင်းဆက်တွေဟာ တိုင်းပြည်အတွင်းမှာ နေထိုင်တဲ့ မတူညီတဲ့ လူမျိုးစုတွေကြား ညီညွတ်မျှတမူပိုမိုဖြစ်ပေါ်စေခြင်းနဲ့ ကြီးမားကျယ်ပြန့်တဲ့ အင်ပါယာကြီးတစ်ခုကို သာယာခိုင်မာအောင်တည်ဆောက်ရမယ်ဆိုတဲ့ သဘောတရားကို ဗုဒ္ဓ၀ါဒမှာ တွေ့မြင်ခဲ့ ကြတယ်။ တူရကီတပ်တွေဟာ ဒီလို အင်ပါတစ်ခုကို သာယာဝပြောခိုင်မာအောင် တည်ဆောက်ဖို့ စိတ်ကူးမရှိခဲ့ ဘူး။ (အက္ကာဘာဘုရင်လက်ထက်တိုင်အောင်) ။ သူတို့ရဲ့ ရည်ရွယ်ချက်ဟာ အင်ပါယာချဲ့ထွင်ပြီး စစ်အောင်နိုင်ခြင်းဖြင့် ပိုမို များပြားတဲ့ ကြွယ်ဝမူတွေ သိမ်းပိုက်ရရှိဖို့နဲ့ ကျေးကျွန်တွေများစွာပိုင်ဆိုင်ဖို့ အတွက်သာဖြစ်ခဲ့တယ်။

ဗုဒ္ဓ၀ါဒဟာ သူတို့လုပ်ရပ် နဲ့ လူနေမူဘ၀ကို ရူတ်ချခဲ့ပေမဲ့၊ သူတို့ရဲ့ အစ်စလာမ်ဝါဒကတော့ ဘုရားသခင်ရဲ့ အမိန့်တော်အဖြစ် အားပေးချီးမြှောက်မူလုပ် ခဲ့ပြီး ဂုဏ်ယူဝံ့ကြွားဖွယ်အဖြစ်လက်ခံခဲ့တယ်။ ဒီအချက်ဟာ ဗုဒ္ဓ၀ါဒရဲ့ အကျင့်သီလသဘောတရားနဲ့ ဖြောင့်ဖြောင့်ကြီး ဆန့် ကျင်နေတဲ့ စိတ်အားထက်သန်မြတ်နိုးမူကို ဆွဲဆောင်ထားတဲ့ အမှန်စင်စစ် ဗုဒ္ဓ၀ါဒတိုက်ဖျက်ရေး ၀ါဒတစ်ရပ်ဖြစ်ခဲ့တယ်။ အဲဒီ ၀ါဒမှာ အကြမ်းဖက်မူ၊ လုယက်ဖျက်ဆီးမူ၊ လိင်ပိုင်းဆိုင်ရာ အနိုင်ကျင့်မူနဲ့ ဘာသာအယူဝါဒဆိုင်ရာ အဆောက်အဦးတွေကို ဖြိုချဖျက်ဆီးမူ လုပ်ရပ်တွေ ပါဝင်နေခဲ့တယ်။ တူရကီတပ်တွေဟာ အကြမ်းဖက်ခြင်းနည်းလမ်းနဲ့ အိန္ဒိယပြည်ကြီးကို သိမ်းပိုက် ခဲ့ပြီး ယဉ်ကျေးမူကြီးကို ဖျက်ဆီးခဲ့တယ်။

ဗြာဟ္မဏ၀ါဒ ဟာ ဗုဒ္ဓ၀ါဒထက်ပိုပြီး အခြေနေ၊ အချိန်ခါနဲ့ ဆီလျော်အောင် ပြောင်းလဲနိုင်စွမ်းရှိခဲ့တယ်။ တူရကီစစ်အတွင်း အိန္ဒိယပြည်မှာ ဗြာဟ္မဏ၀ါဒဟာ ဗုဒ္ဓ၀ါဒထက် ပိုပြီးအားကောင်းစွာရှိနေခဲ့တယ်။ အထူးသဖြင့် အစ်စလာမ်ဝါဒကို အစွမ်းထက်ဆုံး တုန်ပြန်ခုခံခဲ့တဲ့ အိန္ဒိယတောင်ပိုင်းမှာရှိနေခဲ့ တာဖြစ်တယ်။ အေဒီ ပထမ ရာစုနှစ်အတွင်းမှာ ဗြာဟ္မဏ၀ါဒဟာ အထူးသဖြင့် ဗိရှနိုးဝါဒ နဲ့ ရှီ၀၀ါဒ ဟာ အိန္ဒိယက လူထုအကြားမှာ ဗုဒ္ဓ၀ါဒနဲ့ အပြိုင် တဖြည်းဖြည်းအမြစ်တွယ်လာခဲ့တယ်လို့ ခန့်မှန်းကြတယ်။

ဗုဒ္ဓ၀ါဒဟာ ဇာတ်စနစ်ခွဲခြားမူကို ဆန့်ကျင်ထားပြီး အများအတွက်လွတ်လပ်မျှတတဲ့ အများပေါင်းစုအုပ်ချုပ်ပုံစနစ်ကို ထောက်ခံအားပေးထားပေမဲ့ ဗြာဟ္မဏ၀ါဒကတော့ အလယ်ခေတ် မြေရှင်၊ ကံကျွေးချစနစ်နဲ့ ပေါင်းစည်း တည်ဆောက်ထားပြီး ဇာတ်ခွဲ ခြားမူစနစ်ကို ထောက်ခံအားပေးခဲ့တယ်။ ဖန်ဆင်းရှင်ဘုရားသခင်ဝါဒမှာ အထူးသဖြင့် ဗိရှနိုးဝါဒနဲ့ ရှီဝ ၀ါဒရဲ့ တစ်ဆူတည်းသော ဖန်ဆင်းရှင် ဘုရားသခင်ဝါဒမှာ ဒီလို ဇာတ်အနိမ့်အမြင့်စနစ်ဟာ ပကတိအမှန်တရားတစ်ခုဖြစ်ပြီး သဘာဝအဖြစ်လက်ခံထား တယ်။ လူသားတွေဟာ သူတို့ထက်မြင့်မြတ်တဲ့ ရေမြေရှင်၊ အရှင်သခင်တွေကိုနာခံရသလို၊ လူသားအားလုံးဟာလည်း ဖန်ဆင်းရှင် ဘုရားသခင်ကို နာခံရတယ်။ (၁၂) ရာစုနှစ် အိန္ဒိယပြည်ရဲ့ဒေသအများစုမှာ ၊ အထူးသဖြင့်တောင်ပိုင်းဒေသ မှာ ပုံစံ မျိုးစုံရှိနေခဲ့တဲ့ ဗြာဟ္မဏ၀ါဒဟာ ဗုဒ္ဓ၀ါဒထက် အများကြီးပိုမိုပြီး ကိုးကွယ်မူများတဲ့ ဘာသာတရားအဖြစ်ရှိနေခဲ့တယ်။ အဲဒီ ခေတ်ကာလမှာ ဗုဒ္ဓ၀ါဒဟာ အတွေးခေါ်ပိုင်းဆိုင်ရာ၊ ကျမ်းဂန် သင်ကြားလေ့လာမူမှာ အများကြီး အားပြုနေခဲ့တယ်။

အဲဒီခေတ် က ဗုဒ္ဓ၀ါဒ အစဉ်အလာရဲ့ ဗဟိုချက်ဟာ လူထုကြားမှာထက် တက္ကသိုလ်စာသင်တိုက်ကြီးတွေမှာ ရှိနေခဲ့တယ်။ အဲဒီ တက္ကသိုလ်စာသင်တိုက်ကြီးတွေ ဖျက်ဆီးခံလိုက်ရတဲ့အခါ ဗုဒ္ဓ၀ါဒ အစဉ်လာကြီး ကျိုးပျက်သွားခဲ့ရပါတယ်။ သာမာန်လူ ထုဟာ ဗုဒ္ဓ၀ါဒရဲ့ လေးနက်တဲ့ သဘောတရားတွေကို နားလည်ခဲ့မှာ မဟုတ်ဘူး။ သူတို့ဟာ သူတို့ရဲ့ အိမ်နီးနားခြင်း ဗိရှနိုးဝါဒီ တွေက ကရ်ရှဏဘုရားနဲ့ ဗိရှနိုးနတ်တွေကို ပူဇော်ကိုးကွယ်မူနဲ့ သူတို့ရဲ့ ဗုဒ္ဓနဲ့ ဗောဓိသတ္တကို ပူဇော်ကိုးကွယ်မူဟာ အများကြီး ကွာခြားတယ်လို့ မြင်ခဲ့မှာ မဟုတ်ဘူး။

ပိဋကတ် ကျမ်းတတ် ရဟန်းတော်တွေရဲ့ လမ်းညွှန်သင်ပြမူမခံယူရတဲ့ ဗုဒ္ဓဘာသာဝင် သာမာန်လူထုဟာ အများကိုးကွယ် ပူဇော်နေတဲ့ ဗြာဟ္မဏ၀ါဒရဲ့ ကိုးကွယ် ယုံကြည်မူတွေနဲ့ ရောထွေးသွား မှာပါဘဲ။ သံကရ ဗြာဟ္မဏနဲ့ ကုမာရိလ ဗြာဟ္မဏတို့လို ဝေဒ ဘာသာရေးခေါင်းဆောင်တွေ ဟာ ဗုဒ္ဓ၀ါဒဘာသာရေး အယူဆတွေကို စကားယှဉ်ပြိုင်အလဲထိုးပြီး ဝေဒ၀ါဒကို ထွန်းကားပြန့်ပွားစေခဲ့ကြောင်း သမိုင်းအစဉ်အလာတွေမှာ တွေ့ရပါတယ်။ ဒီလိုဘဲ အပြန်အလှန်အားဖြင့် ဗုဒ္ဓ၀ါဒဘက်ကလည်း ဓမ္မကိတ္တိမထေရ်ဟာ သံကရနဲ့ ကုမာရိလ တို့ရဲ့ ၀ါဒကို အလဲထိုးချေပခဲ့တယ်။ ဓမ္မကိတ္တိမထေရ် ဟာ ဗြာဟ္မဏနှစ်ဦးနောက်ပေါ်ထွန်းခဲ့တာဖြစ်ပြီး အဲဒီ ဗြာဟ္မဏတွေရဲ့ ဝေဒအယူဆနဲ့ ပတ်သက်ပြီး သူရဲ့ကျမ်း ဂန်တွေမှာ မှားယွင်းကြောင်းဝေဖန်ထောက်ပြခဲ့တယ်။

ပြီးတော့ အလွန်အောင်မြင်တဲ့ သူ့ရဲ့အစဉ်ဆက် ဗုဒ္ဓ၀ါဒဂိုဏ်းတစ်ခုကို ထူထောင်နိုင်ခဲ့လို့ ဗုဒ္ဓ၀ါဒသဘောတရားတွေဟာ အားသာမယ်လို့ ယူဆရတယ်။ ဒါပေမဲ့ ဒီလိုလေးနက်လှတဲ့ သဘောတရား ရေးရာ ပြိုင်ဆိုင်မူဟာ သာမာန်ပြည်သူတွေကို အများကြီးလွှမ်းမိုးနိုင်ခဲ့ပုံ မရပါဘူး။ သာမာန်ပြည်သူတွေအတွက် ဗြာဟ္မဏ၀ါဒ ဆိုတာ ဝေဒ၀ါဒမဟုတ်ဘူး။ ဗိရှနိုးဝါဒ၊ ရှီ၀၀ါဒ သာဖြစ်တယ်။ ပြီးတော့ ဗိရှနိုးဝါဒနဲ့ ရှီ၀၀ါဒရဲ့ ဘာသာရေးခေါင်းဆောင်တွေဟာသံကရရဲ့ ဖန်ဆင်းရှင် ဘုရားသခင်ဝါဒပေါ်မှာ အခြေမခံတဲ့ ဝေဒ၀ါဒနဲ့ ဝေဒ ပူဇော်မူဓလေ့တွေကိုဝေဖန်တိုက်ခိုက်ခဲ့ကြတယ်။
ဗြာဟ္မဏ၀ါဒရဲ့အင်အားဟာ ဗုဒ္ဓ၀ါဒကို ဆန့်ကျင်တိုက်ဖျက်ခြင်းအပေါ်မှာ မူတည်မနေခဲ့ဘူး။ ဗုဒ္ဓ၀ါဒကို လွင့်စင်သွားစေခဲ့တဲ့ အစ်စလာမ်ဝါဒကို အောင်အောင်မြင်မြင် ကြံ့ကြံ့ခံနိုင်ခဲ့တဲ့ အပေါ်မှာမူတည်ခဲ့တာဖြစ်တယ်။

ဝေဒ စစ်သည်တွေဟာ ကျုးကျော်ဝင်ရောက်လာသူတွေကို ခုခံပြီး တုန်ပြန်တိုက်ထုတ်ဖို့ အဆင့်သင့်ရှိနေခဲ့သလို ဒီလိုကာ ကွယ် တိုက်ခိုက်ရခြင်းဟာ သူတို့ရဲ့တာဝန်တစ်ရပ်အဖြစ် ခံယူထားခဲ့ကြတယ်။ အကယ်၍ စစ်ပွဲမှာ ကျဆုံးခဲ့ရင်လည်း တာဝန် ကျေပွန်စွာ ထမ်းဆောင်ရင်း သေတာဖြစ်လို့ မြတ်သောသေခြင်းဖြစ်ပြီး
ကောင်းကင်ဘုံမှာ စံစားရမယ်လို့ ခံယူကြတယ်။ အိန္ဒိယပြည်ကြီးနဲ့ ရှေးဟောင်းအစဉ်လာယဉ်ကျေးမူတွေကို ကာကွယ်ရင်း ကျဆုံးခဲ့ကြတဲ့ သူရဲကောင်းတွေ အကြောင်းကို အစဉ်လာ သမိုင်းမှတ်တမ်းတွေမှာ တွေ့ကြရတယ်။ လူထုကြားမှာတွင်ကျယ်ခဲ့တဲ့ သူရဲကောင်းစာပေတွေဟာ ရက်စက်တဲ့ သတ်ဖြတ်အကြမ်းဖက်မူ အာဏာရှင်ဝါဒကနေ အင်ဒီးယန်းယဉ်ကျေးမူကြီးကို ကာကွယ်ဖို့ မျှတမှန်ကန်တယ်လို့ ယူဆတဲ့ ရွပ်ရွပ်ချွံချွံ ခုခံမူ၊ တန်ပြန်တိုက်ခိုက်မူကို အားပေးထောက်ခံခဲ့တယ်။ နောက်ဆုံး အိန္ဒိယနိုင်ငံရဲ့ သဘာဝအစဉ်လာ စိတ်ဓါတ်ဟာ အောင်မြင်မူ ရရှိခဲ့တယ်။ ဒီလို အောင်မြင်ခဲ့ပြီး ဟိုရှေးခေတ် အစဉ်အလာမှာ ရှိခဲ့တဲ့ အတွေးခေါ်ဆိုင်ရာ လွတ်လပ်မူ နဲ့ဆန့်ကျင် ဘက် ၀ါဒ အမြင်ကိုးကွယ်မူဘာသာတွေကို နားလည်လက်ခံနိုင်မူ ဒီနှစ်ခု ပြန်လည် ဖြစ်ပေါ်လာတာနဲ့ ဗုဒ္ဓ၀ါဒ ဟာလည်း တစ်ခေတ်ပြန်လည် ထွန်းပ ဖို့ အခွင့်ပေါ်လာခဲ့ပါတယ်။
ကက်ရ်ှမီးယားဒေသဟာ (၁၄) ရာစုမှာ မွတ်စလင်လက်အောက်ခံဖြစ်ခဲ့ပြီး (၁၅) ရာစု အစောပိုင်းမှာ ဆိကန်ဒါ ရဲ့ ဘာသာရေး ဆိုင်ရာ နှိပ်စက် အကြမ်းဖက်မူကြောင့် အဲဒီဒေသမှာ ဗုဒ္ဓ၀ါဒဟာ လဒခ် နယ်မှ တပါး အခြားနယ်တွေမှာ ပျောက်ကွယ်ခဲ့တယ်။ လဒခ်နယ်ဟာ ဗုဒ္ဓ ဘာသာဝင် အများစု နေထိုင်ရာဖြစ်ပေမဲ့ ဗုဒ္ဓ၀ါဒ ဆက်လက်ကိုးကွယ်မူ မပြတ်ဆဲဘဲ ကျန်ရစ်ခဲ့တဲ့ အခြား ဟိမန္တာဒေသတွေမှာ လိုဘဲ အားကောင်းတဲ့ တိဘက် ဗုဒ္ဓဘာသာရဲ့လွှမ်းမိုးမူခံရပြီး သက္ကတလေ့လာသင်ယူမူကတော့ရှေးခေတ် ကာလ ကစပြီး ကွယ်ပျောက်သွားပြီဖြစ်တယ်။

မာဂဓ က စစ်ဘေးဒုက္ခသည်တွေဟာ တောင်ဘက်မှာရှိတဲ့ ကလိင်္ဂ၊ ဂုဂျာရတ်၊ ရာဂျသန်၊ ၀ိဇယ နဂရ နဲ့ အခြားတိုင်းပြည်တွေ ကို ထွက်ပြေးခို လှုံခဲ့ကြတယ်လို့ တာရာနာထ ကရေးသားခဲ့တယ်။ (၀ိဇယနဂရ ဟာ ၁၃၃၆ ကျ မှ တည်ထောင်ခဲ့တာဖြစ်တယ်)ဂုဂျာရတ်နဲ့ အိန္ဒိယ အလယ်ပိုင်း ဟာ အေဒီ ၁၃၀၀ လောက်မှာ ကျဆုံးခဲ့တယ်။ ကလိင်္ဂတိုင်းနဲ့ ၀ိဇယ နဂရကတော့ (၁၆) ရာစု မှာ ကျဆုံးခဲ့တယ်။ စစ်ဒဏ်ခံခဲ့ရတဲ့ အိန္ဒိယတောင်ပိုင်းမှာ ကျန်ရှိနေတဲ့ ဗုဒ္ဓဘာသာဝင်တွေဟာ သီဟိုဠ်ကို ရောက်ရှိသွားမယ်လို့ ယူဆရတယ်။

တူရကီတွေဟာ အိန္ဒိယနိုင်ငံမြောက်ပိုင်းကိုတောင်မှ ရာနှုန်းပြည့် အစ်စလာမ် သာသနာသွတ်သွင်းဖို့ မအောင်မြင့်ခဲ့ဘူး။ အိန္ဒိယ နိုင်ငံကြီးဟာ ကျယ်ပြန့်လွန်း၊ လူဦးရေများလွန်းပြီး ပထ၀ီဝင်အနေထားကလည်း ကွဲပြားလွန်းနေရုံမျှ မကဘူး တူရကီတွေ သိမ်း ပိုက်နိုင်တဲ့ အင်ပါယာကို လည်း လွတ်လပ်တဲ့ သို့မဟုတ် ယာယီအားဖြင့်သာ သိမ်းပိုက်ထားနိုင်တဲ့ ဒေသခံ အိန္ဒိယမင်းတွေ ရဲ့ နိုင်ငံတွေ ၀န်းရံတည်ရှိနေခဲ့တာဖြစ်တယ်။

အိန္ဒိယရဲ့ ပင်ကိုယ်သဘာဝ စိတ်ဓါတ်ဟာ ပျောက်ကွယ်မသွားခဲ့ဘူး။ ကာလ ရှည်ကြာစွာ သိမ်းပိုက် ခံခဲ့ရတဲ့ ဒေသတွေမှာတောင်မှ (ရာဂျသန်၊ ကလိင်္ဂ၊ တိရဘုက်တိ) စတဲ့ လွတ်လပ်တဲ့ တိုင်းနိုင်ငံတွေက အများပြည်သူတွေကြား ထွန်းကားပြန့်ပွားနေတဲ့ စာပေတွေရဲ့ လွှမ်းမိုးမူနဲ့ အဲဒီ အင်ဒီးယန်း စိတ်ဓါတ်ဟာ ရှင်သန်လျက်ရှိနေခဲ့တယ်။ (၁၆) ရာစု အထိ အိန္ဒိယဒေသခံ ပြည်သူအများစု ဟာ ဟိန္ဒူတွေဖြစ်တယ်။ အက္ကဘာဘုရင်ဟာအိန္ဒိယ ပြည်ရဲ့ ဒေသများစွာကို သိမ်းပိုက်ပြီး အင်ပါယာထူထောင်တဲ့အခါ ဒီ အချက်ကို သဘောပေါက်ခဲ့ပြီး မူဝါဒသစ်တစ်ရပ်ကို ကျင့်သုံးခဲ့တယ်။ အဲဒီမူဝါဒဟာ အမှန်တကယ်တော့ အစ်စလာမ် မူဝါဒကို ဆန့်ကျင်နေတဲ့ အင်ဒီးယန်း မူဝါဒတစ်ရပ်သာ ဖြစ်ခဲ့တယ်။

သူဟာ ဘာသာရေးဆိုင်ရာ ကွဲပြားမူကို ခွင့်ပြုခဲ့တယ်။ အဲလို ခွင့်ပြုခဲ့တဲ့အတွက် ရာဇပုတ်ဘုရင်တွေရဲ့အင်အားဟာ သူ့စစ်တပ် အတွင်းပါဝင်လာပြီး သူ့ရဲ့အင်ပါယာကို ပိုပြီးခိုင်မာအောင် တည်ဆောက်နိုင်ခဲ့တယ်။ သို့သော်လည်း အဲဒီ မူဝါဒဟာ သူ့နန်း တော်က ရှေးရိုးစွဲ မွတ်စလင်တွေကို မကျေမနပ်ဖြစ်စေခဲ့တယ်။ အက္ကဘာဘုရင် သေဆုံးတဲ့အခါ ဘာသာရေးဆိုင်ရာ မတူကွဲ ပြားမူ ခွင့်ပြုချက်ဟာ အဆုံးသတ်သွားခဲ့တယ်။ အရင်ကလို ဘာသာရေး အကြမ်းဖက်မူတွေ ပြန်လည် ဖြစ်ပေါ်လာခဲ့တယ်။

အိန္ဒိယ ဘုရားကျောင်းတွေ၊ စာသင်ကျောင်းတွေ ဖြိုဖျက်ခံခဲ့ရသလို ဟိန္ဒူတစ်ဦး အပေါ်မှာလည်း ဘာသာရေးအခွန်ကို ပြန်လည် ကောက်ခံခဲ့တယ်။ ဒီအချက်တွေကြောင့် နေရာအနှံ့ပြား တော်လှန်ပုန်ကန်မူတွေ ပေါ်ပေါက်ခဲ့ပြီး ဒီတော်လှန်မူကို တဖြည်းဖြည်းနဲ့ မရာထဌ် ပြည်နယ်က ဦးဆောင်ခဲ့တယ်။ ၁၆၇၄ မှာ ရှီဝဂျီဟာ မရာဌ် ပြည်ရဲ့ ဘုရင်ဖြစ်လာခဲ့ပြီး သူ့နောက် ဆက်ခံခဲ့တဲ့ ဘုရင်တွေဟာ သူတို့ရဲ့အင်ပါယာကို အိန္ဒိယတောင်ပိုင်းဒေသအများစု ထိအောင် ချဲ့ထွင်နိုင်ခဲ့တယ်။ အဲဒီနောက် အိန္ဒိယမြောက်ပိုင်း လွတ်မြောက်ရေးအတွက် စတင် ဆင်နွှဲတိုက်ခိုက်ခဲ့တယ်။ (၁၈) ရာစုရဲ့ ပထမနှစ်ဝက်မှာ သူတို့ဟာ ဂင်္ဂါမြစ် တောင်ဘက်ခြမ်းက ဒေသအများစုကို သိမ်းယူနိုင်ခဲ့တယ်။

၁၇၅၀ မှာ တူရကီတွေရဲ့မြို့တော် ဒေလ်ဟီကို သိမ်းယူနိုင်ခဲ့ပြီး အက္ကဘာဘုရင်ရဲ့ အဆက်နွယ်တွေကို အစောင့်ရှောက်ခံ ဘုရင်တွေအဖြစ် ထားခဲ့တယ်။ (၁၉) ရာစုရောက်လာတဲ့အခါ ဗြိတိသျှတပ်တွေရောက်လာပြီး မရာဌ် အင်ပါယာ မဖြစ်ပေါ်လာနိုင်တော့ ပါဘူး။သို့သော်လည်း အရေးကြီးတဲ့အချက်ကတူရကီသြဇာနဲ့ မွတ်စလင်အုပ်ချုပ်ရေး ပြိုလဲသွားခဲ့ပြီး မရာဌ်ပြည်ဟာ အိန္ဒိယနိုင်ငံ ဒေသများစွာမှာ ဘာသာရေးဆိုင်ရာ မတူကွဲပြားမူကို ပြန်တည်ဆောက်ခဲ့တဲ့ အချက်ဖြစ်တယ်။ ဗြိတိသျှတွေကလည်း ဒီ မူဝါဒကို ပိုမိုကျယ်ပြန့်တဲ့ အိန္ဒိယနိုင်ငံ တစ်ခုလုံးမှာဆက်လက် ကျင့် သုံးခဲ့တယ်။ ဒါကြောင့်မို့ ဗုဒ္ဓဘာသာဝင်တွေဟာ အိန္ဒိယနိုင်ငံကို ပုန်းလျှိုးကွယ်လျှိုးနဲ့ ဘုရားဖူးသွားစရာ မလိုတော့ဘဲ ၊ ဗုဒ္ဓဂါယာ၊ ဆာရာနထ်နဲ့ အခြားဗုဒ္ဓ၀င်နေရာတွေကို ပြန်လည် ပြုပြင်တည်ဆောက်နိုင်ခဲ့ကြတယ်။ အဲဒီနေရာတွေမှာ ရဟန်းတော်တွေအတွက် ဘုန်းကြီးကျောင်းတွေကိုလည်း တခါပြန်ပြီး ဆောက်လုပ်ခွင့် ရခဲ့ကြတယ်။

အာရပ်နဲ့ တူရကီ စစ်တပ်တွေ အိန္ဒိယနိုင်ငံတွင်း ၀င်ရောက်သိမ်းပိုက်ခြင်းရဲ့ အကျိုးဆက်ကတော့ မာဂဓတိုင်းနဲ့ အိန္ဒိယနိုင်ငံ အနောက်မြောက်ပိုင်းကို ဗဟိုပြုထွန်းကားခဲ့တဲ့ အစောပိုင်းခေတ် ဗုဒ္ဓ၀ါဒဂိုဏ်း အများစု ပျောက်ကွယ်သွားခဲ့ရတာဖြစ်တယ်။ အဲဒီ ဘေးဒဏ်က လွတ်မြောက်ပြီး ထွန်းကားပြန့်ပွားခဲ့တဲ့ တစ်ခုတည်းသော ဗုဒ္ဓ၀ါဒဂိုဏ်းကတော့ ထေရ၀ါဒဂိုဏ်းဖြစ်တယ်။ ထေရ၀ါဒ ဗုဒ္ဓဘာသာဂိုဏ်းဟာ အိန္ဒိယနိုင်ငံတောင်ပိုင်း၊ အထူးသဖြင့် သီဟိုဠ်ကျွန်းမှာ ဗဟိုပြုထွန်းကားခဲ့တာဖြစ်ပြီး အခြား အရှေ့တောင်အာရှနိုင်ငံတွေမှာလည်း အားကောင်းစွာပြန့်ပွားသွားခဲ့တယ်။ တရုတ်နိုင်ငံနဲ့ အဲဒီကတဆင့် ဗုဒ္ဓ၀ါဒကို လက်ခံ ရရှိခဲ့တဲ့ နိုင်ငံတွေမှာတော့ အစောပိုင်းဗုဒ္ဓ၀ါဒဂိုဏ်း တွေနေရာမှာ မဟာယာနဂိုဏ်း (အထူးသဖြင့် ၀ိဉာဏ၀ါဒဂိုဏ်း)က လုံးဝ အစားထိုးနေရာယူသွားခဲ့တယ်။ အဘိဓမ္မာပိဋကတ်ရဲ့ အချို့သောကျမ်းဂန်တွေနဲ့ အခြေခံကျဆုံး ၀ိနည်းကျမ်းတွေကလွဲရင် အားလုံးကို အစားထိုးခဲ့တာဖြစ်တယ်။ ဒါကြောင့်မို့လို့ သုတ္တန္တိကဂိုဏ်း၊ သဗ္ဗတ္ထိဝါဒဂိုဏ်း၊ ဗဟုသုတ္တိယဂိုဏ်းနဲ့ ဓမ္မဂုတ္တိကဂိုဏ်း တွေရဲ့ ကျမ်းဂန်တွေကို တစ်စိတ်တစ်ပိုင်းအားဖြင့် အနည်းအပါးသာ တွေ့ကြရတာဖြစ်တယ်။

တိဘက်နဲ့ အဲဒီကတဆင့် ဗုဒ္ဓ၀ါ ဒ ပြန့်ပွားသွားတဲ့ နိုင်ငံတွေမှာတော့ အစောပိုင်း ဗုဒ္ဓ၀ါဒဂိုဏ်းတွေရဲ့ကျမ်းဂန်တွေကို တရုတ်နိုင်ငံမှာလောက် မတွေ့ရတော့ပါဘူး။ ဘာကြောင့် တုန်းဆိုတော့ အဲဒီ ဂိုဏ်းတွေဟာ တိဘက်မှာ အခြေတည်ပြီး မဖွံ့ဖြိုးခဲ့တဲ့အတွက်လို့ ယူဆရတယ်။ တိဘက် မှာ ချွင်းချက်အနေနဲ့ တွေ့ရတာက သုတ္တန္တိကဂိုဏ်းနဲ့ သဗ္ဗတ္ထိဝါဒဂိုဏ်းရဲ့ ကျမ်းဂန်အချို့နဲ့ မူလသဗ္ဗတ္ထိဝါဒဂိုဏ်းရဲ့ ၀ိနည်းကျမ်း အချို့ဖြစ်တယ်။ မဟာယာန ဗုဒ္ဓ၀ါဒဂိုဏ်းကတော့ ကျယ်ပြန့်တဲ့ အရှေ့အာရှဒေသတစ်လျှောက်ပြန့်ပွားသွားခဲ့တဲ့ အတွက် ကံကောင်းတယ် လို့ ဆိုရမှာဖြစ်တယ်။

သို့သော်လည်း ထေရ၀ါဒ ဗုဒ္ဓ၀ါဒဂိုဏ်းဟာ အိန္ဒိယက လာတဲ့အစဉ်အလာအတိုင်း အိန္ဒိယ မူလ ဘာသာစကားနဲ့ ဆက်လက် သယ်ဆောင်သွားခဲ့ပေမဲ့ မဟာယာန၀ါဒီ တွေကတော့ သူတို့ရဲ့ ပိဋကတ်စာပေ လေ့လာရေးမှာ တရုတ်ဘာသာ၊ သို့မဟုတ် တိဘက်